تەڭگە باعامىنا مۇناي باعاسىنىڭ تومەندەۋى ىقپال ەتە مە؟

الماتى. قازاقپارات - قازاقستان ۇلتتىق بانكى مونەتارلىق وپەراتسيالار دەپارتامەنتىنىڭ ديرەكتورى نۇرجان تۇرسىنحانوۆ تەڭگە باعامىنا قاتىستى ويىمەن ءبولىستى، دەپ حابارلايدى قازاقپارات ءتىلشىسى.

وتكەن جۇمادان بەرى تەڭگە باعامى %0,54 عا السىرەپ، بۇگىن تاڭەرتەڭ 430,20 تەڭگە بولدى. «ەڭ الدىمەن ۇلتتىق ۆاليۋتاعا مۇناي باعاسىنىڭ تومەندەۋى ىقپال ەتەدى. Brent سۇرىپتى مۇناي باعاسى وتكەن جۇمامەن سالىستىرعاندا %3 دان استام تومەندەدى جانە بۇگىن ءبىر باررەل ءۇشىن $40,5 بولدى. باعانىڭ تومەندەۋىنە ا ق ش، فرانسيا مەن رەسەيدى قوسا العاندا ءبىرقاتار ەلدەردە COVID-19 دى جۇقتىرۋ جاعدايلارى سانىنىڭ كۇرت وسۋىنە بايلانىستى سۇرانىستىڭ باياۋلاۋىنان قاۋىپتەنۋ ىقپال ەتەدى. ليۆيا ۇلتتىق مۇناي كورپوراتسياسىنىڭ مۇناي ءوندىرۋ دەڭگەيىن تاۋلىگىنە 1 ميلليون باررەلگە دەيىن قالپىنا كەلتىرۋ تۋرالى حابارلاماسى مۇناي باعاسىنا قوسىمشا قىسىم اكەلدى»، - دەدى نۇرجان تۇرسىنحانوۆ.

ونىڭ ايتۋىنشا، ا ق ش-تاعى شيكى مۇناي قورىنىڭ ءوسۋى تۋرالى جاڭالىقتار مۇناي باعاسىنا قىسىم كورسەتۋدىڭ قوسىمشا فاكتورى بولدى.

«الەمدىك قور نارىقتارىندا دا جاعداي ازىرگە كوڭىل كونشىتەرلىك ەمەس. ەكونوميكانى قولداۋ شارالارى مەن فيسكالدىق شارالار توپتاماسى بويىنشا كەلىسسوزدەردەگى ءۇزىلىس، سونداي- اق ەپيدەميولوگيالىق جاعدايدىڭ ناشارلاۋى اياسىندا ا ق ش- تىڭ اكسيالار نارىعى ساۋدا- ساتتىقتىڭ سوڭعى ءۇش كۇنىندە قۇلدىراپ جاتىر. ەۋروپا نارىقتارى سىرقاتتانۋشىلار سانىنىڭ وسۋىنە بايلانىستى ەنگىزىلگەن شەكتەۋ شارالارى اياسىندا تومەندەپ بارادى. وسىنىڭ اسەرىنەن دامۋشى ەلدەردىڭ اكتيۆتەرىنە سۇرانىسىنىڭ تومەندەۋى بايقالادى.

جۇمامەن سالىستىرعاندا مەكسيكا پەسوسى دوللارعا شاققاندا %0,7 عا، رەسەي رۋبلى %1,5 عا، برازيليا رەالى %1,6 عا، ال تۇركيا ليراسى %2,9 عا السىرەدى. تۇرىك ليراسىنىڭ باعامى تۇركيانىڭ فرانسيامەن قارىم-قاتىناسىنداعى شيەلەنىستەرگە جانە ورتالىق بانكتىڭ نەگىزگى مولشەرلەمەنى وزگەرىسسىز ساقتاۋ تۋرالى شەشىمىنە بايلانىستى رەكوردتىق مينيمۋمدى جاڭارتتى. رەسەي رۋبلى سالىق اپتاسى اياقتالعاننان كەيىن جانە دامۋشى ەلدەر نارىقتارىنداعى جالپى ۇردىستەن كەيىن السىرەدى.

بيۋدجەتتىك قاعيدالار جانە سبەربانك اكسيالارى بويىنشا مامىلەدەن ۆاليۋتا قالدىعىن ساتۋ شەڭبەرىندەگى تۇراقتى وپەراتسيالاردان باسقا، ر ف ورتالىق بانكى 26-قازاننان باستاپ قارجى مينيسترلىگىنىڭ «اەروفلوت» ج ا ق اكسيالارىمەن مامىلەسى شەڭبەرىندە ۆاليۋتانى قوسىمشا ساتۋعا كىرىستى»، - دەدى ساراپشى. تەڭگەنىڭ ايىرباستاۋ باعامى ەنەرگيا تاسىمالداۋشىلار نارىقتارىنداعى جانە دامۋشى ەلدەر نارىقتارىنداعى نەگىزگى ۇردىستەرگە سايكەس كەلىپ وتىر.

اۆتور: گۇلميرا عوسمانالي