سەناتوردىڭ ايتۋىنشا، باسقا ەلدەرمەن شەكارالاس اۋىلداردا 1,5 ميلليونعا جۋىق ادام تۇرادى.
«حالقى 200 ادامعا جەتپەيتىن 1300-گە تارتا اۋىل مەملەكەت نازارىنان تىس ءارى قولداۋسىز قالدى. تەك كەيىنگى ءۇش جىلدىڭ وزىندە «نۇرلى جەر» باعدارلاماسى بويىنشا 10 ميلليون شارشى مەتردەن استام تۇرعىن ءۇي سالىندى. الايدا قاراجاتتى ءبولۋ كەزىندە باستى نازار نۇر- سۇلتان، الماتى قالالارىنا، وبلىس جانە اۋدان ورتالىقتارىنا اۋدارىلدى»، - دەدى ولگا بۋلاۆكينا سەنات وتىرىسىندا.
دەپۋتاتتىڭ ايتۋىنشا، ءتىپتى تۇرعىن ءۇي سالىنىپ قويعان اۋىلدارداعى جەر ۋچاسكەلەرى ماسەلەسى دە رەتتەلمەگەن. سونداي- اق سەناتور جەكە تۇرعىن ءۇي سالۋ ماسەلەسى دە ول اۋىلداردا كۇردەلى ەكەنىن جەتكىزدى. ونىڭ ايتۋىنشا، حالقى 5 مىڭ ادامنان تۇراتىن اۋىلدار سۋ جانە ەلەكتر جەلىلەرىمەن قامتاماسىز ەتىلۋى كەرەك. الايدا كەيبىر اۋداندا وعان بولەر قاراجات جوق. مۇنىڭ سالدارى ازاماتتاردىڭ جەر ۋچاسكەسىن الۋ قۇقىعىن شەكتەپ وتىر.
شەكارالاس اۋدانداردا قاجەتتى ماتەريالدىق جانە الەۋمەتتىك ورتانى قالىپتاستىرۋ ءۇشىن نە ىستەلىپ جاتىر؟ شەكارالاس اۋداندارعا گرانت ءبولۋ نەمەسە ولاردى قانداي ءبىر مەملەكەتتىك تۇرعىدا قولداۋ شارالارى قاراستىرىپ جاتىر ما؟ سالىق جاعىنان ول جاقتاعى تۇرعىندارعا جەڭىلدىك بەرىلە مە؟
ولگا بۋلاۆكينا ۇكىمەت باسشىسىنا وسى ساۋالداردى قويىپ، بەلگىلەنگەن مەرزىم ىشىندە جاۋاپ بەرۋدى ءوتىندى. سونداي- اق دەپۋتات اتالعان اۋدانداردا جۇمىسپەن قامتۋ مەن بيزنەستىڭ جول كارتاسى دۇرىس جۇزەگە اسىرىلماي جاتقانىنا نازار اۋدارۋعا شاقىردى.
اۆتور: ايان بەكەن ۇلى