الەم ەلدەرى ىندەتتىڭ تارالۋىن توقتاتۋ ءۇشىن قانداي شەشىم قابىلداپ جاتىر؟

الەم ەلدەرى ىندەتتىڭ تارالۋىن توقتاتۋ ءۇشىن قانداي شەشىم قابىلداپ جاتىر؟ الەمدە كوروناۆيرۋس جۇقتىرعاندار سانى كۇن سايىن ارتىپ كەلەدى. كوپ مەملەكەت دەرتتىڭ تارالۋىن تەجەۋ ءۇشىن الدىن الا شارالار قابىلداپ، شەكتەۋلەردى قاتاڭداتىپ جاتىر. مىسالى، مالايزيا بيلىگى كۋالا- لۋمپۋر قالاسى مەن سەلانگور شتاتىندا تۇرعىنداردىڭ ءجۇرىپ- تۇرۋىن قايتا شەكتەدى. ءبىر اۋداننان ەكىنشى اۋدانعا بارۋ ءۇشىن ارنايى رۇقسات كەرەك. مەكتەپتەر جابىلىپ، 2 اپتاعا دەيىن ءدىني، سپورتتىق جانە وزگە دە ءىس- شارالاردى وتكىزۋگە تىيىم سالىندى. ءبىراق شاعىن جانە ورتا بيزنەسكە جۇمىسىن جالعاستىرۋعا رۇقسات ەتىلگەن.

شاريف احماد، مەيرامحانا قوجايىنى:

- ءبىز مەيرامحاناعا ادامداردى تەمپەراتۋراسىن تەكسەرىپ بارىپ كىرگىزەمىز. بارلىق قوناقتاردىڭ جەكە مالىمەتتەرى جازىلىپ الىنادى. ادامدار مۇنىڭ قاجەت شارالار ەكەنىن تۇسىنەدى. ەكونوميكالىق ماسەلەلەردى العا تارتىپ كارانتين ءتارتىبىن قاتاڭداتپاي كەلگەن نيدەرلاند بيلىگى دە ىندەتتى اۋىزدىقتاۋ ءۇشىن جاڭا شەكتەۋلەر ەنگىزدى. مەملەكەتتە بۇگىننەن باستاپ مەيرامحانا مەن ءدامحانالار جابىلدى. كەشكى ساعات 20:00 دەن كەيىن ىشىمدىك ساتۋعا تىيىم سالىندى. 13 جاستان جوعارى ادامداردىڭ بارىنە كوپتەگەن قوعامدىق ورىندا بەتپەردە تاعىپ ءجۇرۋ مىندەتتەلدى.

مارك ريۋتتە، نيدەرلاند پرەمەر- ءمينيسترى:

- جاڭا شەكتەۋلەر ەكونوميكاعا كوپ زالالىن تيگىزەتىنىن تۇسىنەمىن. ءبىراق ىندەتىڭ تارالۋىنا توسقاۋىل قويۋ ءۇشىن وسىنداي قادامعا بارۋعا ءماجبۇرمىز. سەبەبى رەسمي مالىمەتتەر وتىرىك ايتپايدى. ءبىز وزىمىزگە بارىنشا قاتاڭ قاراپ، ىندەتپەن كۇرەسكە اتسالىسۋىمىز كەرەك. ال شۆەتسيادا جۇمىس ورىندارىندا ۆيرۋستى جۇقتىرعاندار كوبەيگەن. بيىلعى جارتى جىلدا دارىگەرلەردىڭ كومەگىنە 9 مىڭ ادام جۇگىنگەن. بۇل وتكەن جىلعىمەن سالىستىرعاندا 60 پروتسەنتكە ارتىق. ولاردىڭ اراسىندا مەديتسينا سالىسىنىڭ قىزمەتكەرلەرى كوپ. الەمدە دەرتتىڭ تارالۋى بويىنشا كوش باستاپ تۇرعان ا ق ش- تا ۆيرۋستى جۇقتىرعاندار قايتا ءوستى. امەريكانىڭ 20 شتاتىندا دەرتكە شالدىققاندار سانى كۇرت ارتتى. بىرنەشە كۇن بۇرىن كارانتين شەكتەۋلەرىن ەكى اپتاعا سوزعان ارگەنتينادا دا ۆيرۋستى جۇقتىرعاندار سانى ارتقان. ينفەكتسياعا شالدىعۋ دەرەگىنىڭ كوبى بۋەنوس- ايرەس قالاسىندا تىركەلۋدە. ماماندار شەكتەۋلەردى ۇزارتۋ ىندەتتىڭ تارالۋىن ازايتادى دەپ ۇمىتتەنەدى.

نينا مارتينەس، جەرگىلىكتى تۇرعىن:

- ۇكىمەتتىڭ شەكتەۋلەردى ۇزارتقانىن قولدايمىن. ويتكەنى ادامدار ساقتىق شارالارىن ورىنداامي وزگەلەردىڭ ومىرىنە ءقاۋىپ توندىرۋدە. مىسالى، جيىندار مەن كەشتەردىڭ سوڭى قالاي اياقتالىپ جاتقانىن ەستىپ جاتىرمىز. دەگەنمەن، دۇنيەجۇزىلىك دەنساۋلىق ساقتاۋ ۇيىمى «كوروناۆيرۋستىڭ ەكىنشى تولقىنى بولمايدى» دەپ مالىمدەپ وتىر. ۇيىم وكىلدەرى دەرتتىڭ كۇشەيۋى كوبىنە ادامداردىڭ ۆيرۋستىڭ قاۋىپتى ەكەنىنە ءمان بەرمەۋىنەن دەيدى. سوندىقتان ازماتتاردى جۇقپالى كەسەلدەن بارىنشا ساقتانۋعا شاقىرىپ وتىر.

اۆتور: داۋرەن اقاش ۇلى

www.24.kz