ەكونوميكا سالاسىندا بيىلعى نوبەل سىيلىعىن كىم يەلەندى
ەكونوميكا سالاسىندا نوبەل سىيلىعى پرەميا اۋكسيون تەورياسىن جاساعان امەريكالىق ەكونوميستەر پول ميلگروم مەن روبەرت ۋيلسونعا بەرىلەدى. 72 جاستاعى ميلگروم مەن 83 جاستاعى ۋيلسون بيىلعى سىيلىققا نەگىزگى ۇمىتكەرلەردىڭ ءبىرى سانالعان ەدى. نوبەل كوميتەتى بۇل ماراپات «اۋكسيون تەورياسىن تولىقتىرىپ جاساپ شىعارعانى ءۇشىن» بەرىلىپ وتىرعانىن حابارلادى. بۇل تەوريا ادامداردىڭ اۋكسيون تيپىندەگى نارىقتا ءوزىن قالاي ۇستايتىنىن، قالاي ارەكەت ەتەتىنىن سيپاتتايدى. عالىمداردىڭ بۇل ەڭبەگىن ءومىردىڭ باسقا دا جاعدايلارىندا قولدانۋعا بولادى.
«اۋكسيوننىڭ جاڭا فورماتى - قاراپايىم زەرتتەۋدىڭ كەيىننەن قوعامعا پايداسىن تيگىزەتىن قانشاما ونەرتابىستارعا نەگىز بولا الاتىنىن كورسەتەتىن تاماشا ۇلگى» دەلىنگەن شۆەد اكادەمياسى تاراتقان حابارلامادا. وتكەن جىلى بۇل سىيلىقتى گارۆاردتان مايكل كرەمەر جانە ماسساچۋسەتس تەحنولوگيا يسنتيتۋتىنان ەرلى- زايىپتى ەستەر ديۋفلو مەن ابحيدجيت بانەردجي جەڭىپ العان بولاتىن. ولار كەدەيلىكپەن كۇرەستە ءتيىمدى ءادىس ويلاپ تاپقان ەدى.
ايتا كەتەيىك، بيىلعى نوبەل سىيلىعىن تاپسىرۋ سالتاناتى 10 - جەلتوقساندا ونلاين وتەدى.