بۇل تۋرالى ونلاين بريفينگتە نۇر-سۇلتان قالاسىنىڭ توتەنشە جاعدايلار دەپارتامەنتى اپات قاۋپىن ازايتۋ مەن ازاماتتىق قورعانىس سالاسىن باقىلاۋ باسقارماسىنىڭ باستىعى ەركىن وتارعالىم ۇلى ءمالىم ەتتى، دەپ حابارلايدى قازاقپارات ءتىلشىسى.
«وت جاعىلاتىن پەشتىڭ دۇرىستىعىن ءجيى تەكسەرىپ، ەلەكتر جەلىلەرىنە رەۆيزيا جۇرگىزىپ وتىرۋ كەرەك. بالالاردى ەشقاشان قاراۋسىز قالدىرماي، ءۇي وتپەن جىلىتىلاتىن جاعدايدا اباي بولعان دۇرىس»، - دەدى ەركىن وتارعالىم ۇلى. ول سونىمەن قاتار جىل باسىنان بەرى 12 ادام ورتتەن كوز جۇمعانىن، ءتىلسىز جاۋ ءۇيىن جالماعان كەزدە ونىڭ 10 ى ماس بولعانىن حابارلادى.
«بۇل رەتتە ءاردايىم اباي بولۋ كەرەكتىگىن ەستەن شىعارمايىق. سەبەبى شالىس باسقان ءار قادام كىسىنىڭ وزىنە دە، وتباسى مۇشەلەرى ءۇشىن دە قاۋىپتى»، - دەيدى ول.
ەسكە سالا كەتسەك، بۇعان دەيىن ەركىن وتارعالىم ۇلى ەلوردالىقتارعا پەشتىڭ مۇرجاسى مەن قۇدىعىن تەكسەرىپ، تازالاپ قويۋدى ەسكەرتكەن بولاتىن. ونىڭ ايتۋىنشا، اۋا رايى كۇرت سۋىعان كەزدە پەشتى كەيبىر ۇيلەر شاماسىنان تىس قىزدىرىپ جاتادى. وسى رەتتە مونتاجداۋ كەزىندە كەمشىلىككە جول بەرىلسە، ول ۇيدەن ءورت شىعۋ قاۋپى وتە جوعارى.
اۆتور: ايان بەكەن ۇلى