قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ تاپسىرماسىمەن وقيعا ورنىنا قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتىنىڭ ماماندارى ىسساپارمەن جىبەرىلگەن بولاتىن.
ماماندار ۇيعىر اۋدانىنىڭ شونجى اۋىلىنداعى قۇلاعان دەنە شىنىقتىرۋ- ساۋىقتىرۋ كەشەنىن جەدەل تەكسەرۋدى اياقتادى. ونىڭ ناتيجەسى بويىنشا اپات «9» جانە «10» وستەرى بويىنشا فەرمالاردا باستالعانى انىقتالدى. تسەمەنت- قۇم قۇيىندىسى بەلگىلەنگەن جوبالىق مولشەرىنەن اسىپ كەتكەن. سونداي-اق، جارتىلاي فەرمالاردىڭ جوعارعى جانە تومەنگى بەلدىكتەرىنىڭ قوسىلىستارىنىڭ مونتاجدىق تۇيىندەرى ءار ءتۇرلى كولەمدەگى التى بۇراندامامەن بەكىتىلگەن.
بۇل دا جوبادان اۋىتقۋ بولىپ سانالادى. تىك جۇكتەمە كەزىندە فەرمالاردىڭ مونتاجدىق تۇيىندەرى تارالا باستادى، بۇل ءبىر بۇراندامانىڭ بۇزىلۋىنا جانە كولدەنەڭ جۇكتەمەلەردىڭ فەرمالاردان باعاندارعا بەرىلۋىنە جانە 3-بلوك كونسترۋكتسيالارىنىڭ بىرتىندەپ قۇلاۋىنا اكەلگەن.
وسىلايشا، 3-بلوكتاعى اپاتتىڭ سەبەپتەرىنىڭ ءبىرى - بەكىتىلگەن جوبالاۋ شەشىمدەرىنەن اۋىتقۋى دەپ ايتۋعا بولادى. كوميتەت الماتى وبلىسىنىڭ اكىمدىگىنە ق ر قولدانىستاعى زاڭناماسىنىڭ بۇزىلۋىنا جول بەرگەن تۇلعالاردى (مەردىگەر، تەحنيكالىق جانە اۆتورلىق قاداعالاۋ) جاۋاپكەرشىلىككە تارتۋ تۋرالى حات جولدادى. سونىمەن قاتار، جوبالاۋ قۇجاتتاماسىندا باعاندارمەن قوسىلۋ تۇيىندەرى كەلتىرىلمەگەن جانە فەرمالاردىڭ تىرەك تاعاندارىنىڭ قۇرىلىمى سيپاتتالماعان.
2-بلوكقا جاناساتىن جەردە 3-بلوك جابىنىنىڭ دەڭگەيىندە دەفورماتسيالىق جىكتەردى ورناتۋ بويىنشا شەشىم شىعارىلماعان. وسىعان بايلانىستى جوبالىق قاتەلەر ايقىندالدى. اپاتتىڭ سەبەپتەرى تۋرالى تۇپكىلىكتى تۇجىرىمدار بلوكتىڭ تىرەك كونسترۋكتسيالارىنىڭ ەلەمەنتتەرىنەن ىرىكتەپ الىنعان ۇلگىلەردى ەسەپتەۋ جانە زەرتحانالىق سىناۋ ناتيجەلەرى نەگىزىندە جاسالادى.
ايتا كەتۋ كەرەك، 21-قىركۇيەكتە شونجى اۋىلىنداعى دەنە شىنىقتىرۋ- ساۋىقتىرۋ كەشەنىنىڭ ءۇشىنشى بلوگىنىڭ جۇمساق جابىنىن ورناتۋ جۇمىستارى كەزىندە مەتالل كونسترۋكسيالارى قۇلاعان بولاتىن. قۇلاعان بلوكتىڭ اۋدانى - 1058,4 شارشى مەتر. بۇل عيماراتتىڭ ءبىرىنشى جانە ەكىنشى بلوكتارىنا اسەر ەتكەن جوق. قازا بولعاندار مەن زارداپ شەككەندەر جوق.
اۆتور: گۇلميرا عوسمانالي