بۇل تۋرالى ق ر ىشكى ىستەر مينيسترلىگىنىڭ Facebook پاراقشاسىندا وتكەن ونلاين بريفينگتە اكىمشىلىك پوليتسيا كوميتەتىنىڭ ءتوراعاسى مۇرات بايمۇقاشەۆ ايتتى، دەپ حابارلايدى قازاقپارات ءتىلشىسى.
«ىشكى ىستەر مينيسترلىگىنىڭ باستاماسىمەن «تۇرمىستىق زورلىق- زومبىلىقتىڭ الدىن الۋ تۋرالى» زاڭنىڭ ءبىرقاتار نورمالارى جاڭاردى. اتاپ ايتقاندا، قورعانىس نۇسقاماسىنىڭ قولدانىلۋ مەرزىمى 10 كۇننەن 30 كۇنگە دەيىن ۇزارتىلدى. ىشكى ىستەر ورگاندارى جابىرلەنۋشىنىڭ قاۋىپسىزدىگىن قامتاماسىز ەتۋ ماقساتىندا وتباسىلىق زورلىق- زومبىلىق جاساعان نەمەسە ونى جاساۋ ءقاۋپى بار ادامعا جازباشا تۇردە قورعانىس نۇسقاماسى بەرىلەدى. قۇقىق بۇزۋشىعا جابىرلەنۋشىنىڭ ەركىنە قارسى تۇرمىستىق زورلىق- زومبىلىق جاساۋعا، ونى ىزدەۋگە، قۋدالاۋعا، قوناققا بارۋعا، اۋىزشا، تەلەفون ارقىلى سويلەسۋگە جانە ونىمەن باسقا جولدارمەن، ونىڭ ىشىندە كامەلەتكە تولماعاندار مەن ونىڭ وتباسىنىڭ ەڭبەككە جارامسىز مۇشەلەرىمەن بايلانىس جاساۋعا تىيىم سالىنادى»، - دەيدى اكىمشىلىك پوليتسيا كوميتەتىنىڭ ءتوراعاسى مۇرات بايمۇقاشەۆ.
ونىڭ ايتۋىنشا، قورعانىس نۇسقاماسىنىڭ جارامدىلىق مەرزىمى قۇقىق بۇزۋشىعا جەتكىزىلگەن ساتتەن باستاپ پوليتسيانىڭ پروفيلاكتيكالىق ەسەبىنە قويىلعان وتىز كۇندى قۇرايدى. پروفيلاكتيكالىق باقىلاۋ جۇرگىزىلىپ، جەتى كۇندە كەمىندە ءبىر رەت تەكسەرىپ وتىرادى. سونداي-اق، قورعانىس نۇسقاماسىن بۇزعان جاعدايدا ەسكەرتۋ جاسالادى نەمەسە بەس تاۋلىككە دەيىن اكىمشىلىك قاماۋعا الىنادى. پوليتسيا ورگاندارىنىڭ باسشىلارىمەن بىرگە كامەلەتكە تولماعاندار ىستەرى جانە ايەلدەردى زورلىق-زومبىلىقتان قورعاۋ جونىندەگى پوليتسيانىڭ ۋچاسكەلىك ينسپەكتورلارى قورعانىس بۇيرىقتارىن شىعارۋعا قۇقىلى سوتتىڭ رۇقساتىمەن 30 كۇنگە دەيىن ۇيدەن ۋاقىتشا شىعارا تۇرۋ مۇمكىندىگى ەنگىزىلدى سوت شەشىمىمەن تۇرمىستىق زورلىق- زومبىلىق كورسەتەتىندەرگە الكوگول ىشىمدىك پەن ەسىرتكى بۇيىمدارىن قولدانۋعا تىيىم سالىنادى.
اۆتور: زارينا قاھارمان