سىر ءوڭىرى نەگىزىنەن شولەيتتى ايماق ەكەنى بەلگىلى. شىبىق تىكسەڭ شىعا بەرمەيتىنى تاعى بار. ءاربىر تال- تەرەككە ەرەكشە كۇتىم كەرەك. وسىنداي ايماقتا بارىمىزگە تاڭسىق بامبۋك اعاشىن كىم ءوسىرىپ جاتىر ەكەن دەپ قىزىعۋشىلىق بىلدىردىك. راسىندا دا، جەرگىلىكتى باعبان امانتاي سارباسوۆ بۇل ءىستى بيىل قولعا الىپتى. العاشقىدا ول جايىندا ناقتى دەرەكتەر جيناقتاعان. جاھاندىق جەلىنى شارلاي وتىرىپ كوپتەگەن قۇندى مالىمەتتەرگە كەزىكتى. ونى الۋ جولدارىن قاراستىردى. تانىستارى بامبۋك اعاشىنىڭ كوشەتىن جەتكىزىپ بەرگەندە اۋەلى قالاي بولار ەكەن دەپ ويلانىپ قالعانى راس. قاشاندا تاۋەكەل ىسكە بىلەك سىبانا كىرىسەتىن داعدىسىمەن بۇعان دا نازار اۋداردى.
«العاشقىدا ءوسىپ كەتۋىنە كۇمانىم بولعانى راس. ونىڭ سەبەبى دە جوق ەمەس. نەگىزىنەن ول تروپيكتىك ايماقتاردا وسەدى. ءبىزدىڭ ءوڭىردىڭ كليماتى، اۋا رايى، توپىراعى وعان ساي كەلە مە؟ كۇمانىم بەكەر بولىپ شىقتى. بامبۋك كۇننەن كۇنگە بويىن تىكتەپ، جاسىل جەلەگىن جايقالتا ءتۇستى. قازىر بويىنىڭ ۇزىندىعى 3 مەترگە جەتتى. سۋدا كوبىرەك تۇرۋى كەرەك. ول جاعى قامىسقا ۇقساس. ۇزاق جىلدان بەرى باعباندىقپەن اينالىسقاندىقتان سان الۋان وسىمدىكتەرگە تاجىريبە جاساعاندى جانىم قالايدى»، - دەيدى ول.
بامبۋك - استىق تۇقىمداسىنا جاتاتىن اعاش ساباقتى وسىمدىك. بامبۋكتىڭ 47 تۋىسى، 200 دەن استام ءتۇرى بار. ول اۆستراليا، ازيا جانە امەريكا قۇرلىقتارىندا كەڭىنەن تارالعان.
«وعان ەرەكشە كۇتىم جاساعان جوقپىن. ءوزى بىردەن- اق بويىن تىكتەپ كەتتى. راس، ءبىزدىڭ جەرىمىزدىڭ اۋا رايى قاتال، توپىراعىنىڭ دا قۇنارى تومەن. كەيبىر داقىلدار مەن وسىمدىكتەرگە ارنايى جاعداي جاسالۋى ءتيىس.
«بابىن تاپساڭ جەر جومارت» دەيدى عوي حالقىمىز. مەنىڭ باقشالىعىمدا گرەك جاڭعاعى دا ءوسىپ تۇر. وعان قوسا ميندال، فۋندۋك جاڭعاعى دا بار. المانىڭ 10 سورتىن وسىرەمىن. ورىكتىڭ 4-5 سورتى بار، ءجۇزىمنىڭ دە بىرنەشە سورتى باقشا ءسانىن كەلتىرىپ تۇر. ال گۇلدىڭ 12 ءتۇرى جايقالا وسكەندە وزىڭە ەرەكشە سەزىم سىيلايدى. تاڭەرتەڭ باقشاما باس سۇققاندا سونداي كۇيگە بولەنەمىن»، - دەيدى باعبان.