«ماقساتتارعا توقتالاتىن بولساق، تۇرعىن ءۇي ماسەلەسىن شەشۋ ەسكەرىلگەن. بۇل جەردە ارنايى ەرەجە بەكىتىلەدى، ءتيىستى جۇمىستار اتقارىلۋدا. وسى تۇرعىدا نەگىزگى پارامەترلەر تەك باسپانا ساتىپ الۋمەن شەكتەلمەگەن، ياعني جالپى تۇرىعىن ءۇي جاعدايىن جاقسارتۋعا باعىتتالعان. ول قاراجاتقا تۇرعىن ءۇيدى نەمەسە جەر تەلىمىن ساتىپ الۋعا بولادى. وسى ورايدا تەك جاڭا باسپانا دەگەن ۇعىم جوق، قايتالاما نارىقتان دا ءۇي ساتىپ الۋ مۇمكىندىگى بار. يپوتەكا الۋعا العاشقى جارنا رەتىندە پايدالانۋعا، يپوتەكانى جابۋعا نەمەسە قايتا قارجىلاندىرۋ ماقساتىنا باعىتتاۋعا بولادى»، - دەدى مينيستر ورتالىق كوممۋنيكاتسيالار قىزمەتىندە.
ونىڭ سوزىنە قاراعاندا، بۇل تۇرعىدا يپوتەكا قاي بانكتەن الىنعانىنا نەمەسە قانداي باعدارلامامەن راسىمدەلگەنىنە ەشقانداي شەكتەۋ قويىلمايدى.
«باسپانا كولەمىن كەڭەيتۋگە پايدالانۋعا بولادى. بۇل مۇمكىندىكتى تەك وزىنە ەمەس، سونىمەن قاتار جاقىن تۋىستارىنا دا تارالادى دەپ جوسپارلادىق. جاقىن تۋىستارىنا اتا-اناسى، بالالارى، باۋىرلارى اتا- اجەسى، نەمەرەلەرى كىرەدى. قاراجاتتىڭ ماقساتتى پايدالانىلۋى ءۇشىن ءبىرىڭعاي وپەراتور بولادى، سول وپەراتور ازاماتتىڭ تاپسىرىسى بويىنشا جيناقتاۋشى قورىمەن بايلانىسىپ، سول جەردەگى ءتيىستى قاراجاتىڭىزدى باسپانا، جەر تەلىمىن ساتىپ جاتقان ادامعا نەمەسە يپوتەكا راسىمدەلگەن بانكتەرگە اۋدارادى»، - دەپ ناقتىلادى مينيستر.
بۇدان بۇرىن حابارلانعانداي، ق ر ەڭبەك جانە حالىقتى الەۋمەتتىك قورعاۋ ءمينيسترى «جەتكىلىكتىك شەگىنە» قاتىستى تۇسىنىك بەردى.
ايتا كەتەيىك، زەينەتاقى قاراجاتىنىڭ ءبىر بولىگىن پايدالانۋ قۇقىعى 2021 -جىلدان باستاپ بەرىلەتىن بولادى. زەينەتاقى جيناقتارىنىڭ ءبىر بولىگى تۇرعىن ءۇي جاعدايىن جاقسارتۋ، ەمدەلۋ نەمەسە قارجى كومپانيالارىنا باسقارۋعا بەرۋ ءۇشىن الىنۋى مۇمكىن. ەگەر ماقساتتى پايدالانۋعا قاجەت بولسا، وتباسى مۇشەلەرىنىڭ قاراجاتىن بىرىكتىرۋگە بولادى.
اۆتور: رۋسلان عابباسوۆ