8 - قازاندا قىرعىز رەسپۋبليكاسىنىڭ مەملەكەتتىك ۇلتتىق قاۋىپسىزدىك كوميتەتى (م ۇ ق پ) كوللەگياسىنىڭ زالىندا قىرعىزستاننىڭ قاۋىپسىزدىك كەڭەسىنىڭ حاتشىسى مىندەتىن اتقارۋشى، كۇشتىك قۇرىلىمدار مەن قۇقىق قورعاۋ ورگاندارىنىڭ ۇيلەستىرۋشىسى و. سۋۆانالييەۆتىڭ توراعالىعىمەن وتىرىس بولىپ ءوتتى. بۇل تۋرالى م ۇ ق پ باسپا ءسوز قىزمەتى حابارلادى.
وتىرىسقا رەسپۋبليكاداعى قاۋىپسىزدىك كەڭەسىنىڭ حاتشىلىعى مەن كۇشتىك، اسكەري جانە قۇقىق قورعاۋ قۇرىلىمدارىنىڭ باسشىلارى قاتىستى.
وتىرىستا ەلدەگى قوعامدىق- ساياسي احۋالدى تۇراقتاندىرۋ ماسەلەلەرى مەن ازاماتتاردى، قوعام مەن مەملەكەتتى قورعاۋ ءۇشىن ارنايى قىزمەت، قۇقىق قورعاۋ ورگاندارى مەن قارۋلى كۇشتەردىڭ جۇمىسىن جەدەل تۇردە ۇيلەستىرۋ ماسەلەلەرى تالقىلاندى. سونىمەن قاتار قىرعىز رەسپۋبليكاسىندا بولىپ جاتقان سىن- قاتەرلەر مەن قاۋىپ- قاتەرلەرگە ۋاقتىلى دەن قويۋ جانە مەملەكەتتىك باسقارۋ جۇيەسىن زاڭدى ارناعا قايتارۋ ماسەلەسى پىسىقتالدى.
و. سۋۆاناليەۆتىڭ قىرعىز رەسپۋبليكاسىنداعى احۋال تۋرالى اقپاراتىن تىڭداعاننان كەيىن جينالعاندار «2020 -جىلدىڭ 5 - قازانىنداعى وقيعالارعا بايلانىستى قىرعىز رەسپۋبليكاسىندا قاۋىپسىزدىك پەن زاڭدىلىقتى قامتاماسىز ەتۋ شارالارى تۋرالى» حاتتامانى قابىلدادى. حاتتاما 12 تارماقتان تۇرادى. وندا قاۋىپسىزدىك پەن زاڭدىلىقتى قامتاماسىز ەتۋگە باعىتتالعان نەگىزگى باسىمدىقتار بەكىتىلگەن. قىرعىز رەسپۋبليكاسىنىڭ بارلىق كۇش قۇرىلىمدارى ەلدەگى تۇراقتىلىقتى قامتاماسىز ەتۋ ءۇشىن تۇسىنىستىك تانىتىپ، بىرىگۋى كەرەك. سونىمەن قاتار جەكە قۇرامنىڭ مورالدىق- پسيحولوگيالىق جاعدايىن جاقسارتۋ بويىنشا قاجەتتى شارالاردى قابىلداۋ، جەكە قۇرامنىڭ ءومىرى مەن دەنساۋلىعىنىڭ قورعالۋىن، سونداي- اق قارۋ- جاراقتىڭ، وق- دارىلەردىڭ، اسكەري، ارنايى جانە وزگە دە تەحنيكا مەن مۇلىكتىڭ ساقتالۋىن قامتاماسىز ەتۋ ماسەلەلەرى ماقۇلداندى. بارلىق دەڭگەيدە، سونىڭ ىشىندە ەرىكتى حالىق ساقشىلارىن تارتا وتىرىپ، ناقتى جانە جان- جاقتى ءوزارا ارەكەتتەسۋدى قامتاماسىز ەتۋ مىندەتى كەلىسىلدى.
ارنايى شارالاردى جۇرگىزۋ بارىسىندا فۋنكسيالار، مىندەتتەر، وكىلەتتىكتەر مەن جاۋاپكەرشىلىك سالالارىن ناقتى بەلگىلەي وتىرىپ، تۇراقسىزدىقتىڭ ىقتيمال وشاقتارىندا ارنايى ءىس- شارالاردىڭ ءبىرىڭعاي بىرلەسكەن جوسپارىن ازىرلەۋ جانە قابىلداۋ كوزدەلىپ وتىر. سونداي- اق، حاتتاماعا سايكەس، ەلدەگى قىلمىستىق احۋالدىڭ ناشارلاۋىنا جول بەرمەۋ، قىلمىسكەرلەردىڭ رەسپۋبليكاداعى ءتۇرلى ساياسي كۇشتەرگە ىقپال ەتۋ ارەكەتتەرىن، مەملەكەتتىك ورگانداردى تۇراقسىزداندىرۋعا تالپىنۋ ۇمتىلىستارىن قاتاڭ جولمەن تىيۋ تۋرالى شەشىم قابىلداندى.
قىلمىسكەرلەر مەن ۇيىمداسقان قىلمىستىق توپتاردىڭ ارەكەتتەرىن بەيتاراپتاندىرۋ، ونىڭ ىشىندە زاڭسىز ساقتالعان قارۋ- جاراق پەن وق- دارىلەردى تاركىلەۋ بويىنشا بەلسەندى شارالار جۇرگىزۋ جوسپارلانۋدا. قىلمىستىق- اتقارۋ جۇيەسى مەكەمەلەرىندەگى جاعدايدىڭ تۇراقسىزدىعىنا جول بەرمەۋ جانە ارنايى كونتينگەنتكە قىلمىستىق ەلەمەنتتەردىڭ سىرتتان اسەرىن بولدىرماۋ بويىنشا شارالار قابىلداۋ جونىندە ورتاق شەشىم جاسالدى.
ستراتەگيالىق جانە باسقا دا ماڭىزدى نىسانداردىڭ كۇزەتىن كۇشەيتىپ، مەملەكەتتىك جانە جەكە مەنشىك نىسانداردىڭ قاۋىپسىزدىگى قامتاماسىز ەتىلەدى. دەسترۋكتيۆتى سيپاتتاعى كۇشتەردىڭ ەلدەگى قوعامدىق- ساياسي احۋالدى تۇراقسىزداندىرۋعا باعىتتالعان بارلىق ارەكەتىن، سونىڭ ىشىندە ايماقارالىق جانە ەتنوسارالىق نەگىزدەگى ارانداتۋشىلىق ارەكەتتەردى، سونداي- اق مەملەكەتتىك ورگانداردىڭ قىزمەتىنە جانە جەكە مەنشىككە كەدەرگى جاساۋ، ءارتۇرلى نىسانداردى رۇقساتسىز باسىپ الۋ قيمىلدارىن جەدەل جانە قاتاڭ جولمەن باسۋ جوسپارى ماقۇلداندى.
ەسكە سالايىق، جەكسەنبى، 4- قازان كۇنى قىرعىزستاندا جوگوركۋ كەنەشكە دەپۋتاتتاردى سايلاۋ ءوتتى. دەپۋتاتتىق مانداتقا 16 پارتيا ۇمىتكەرلىك ەتتى. داۋىس بەرۋدىڭ الدىن الا مالىمەتى بويىنشى، % 7 مەجەنى 4 پارتيا ەڭسەردى. ال، 5 - قازان كۇنى سايلاۋ ناتيجەسىنە كوڭىلى تولماعان ءبىر توپ ادام ورتالىق الاڭدا ميتينگ ۇيىمداستىرىپ، ودان كەيىن اق ۇيگە بەتتەدى. ولاردى تارقاتۋ ءۇشىن ميليتسيا كوز جاساۋراتاتىن گاز، سۋاتقىش جانە گاز- شۋىلدى قۇرىلعىلار قولدانعان.
بىشكەك ۋاقىتىمەن ساعات 22.00-دەگى ءمالىم بويىنشا، اۋرۋحاناعا زارداپ شەككەن 16 ادام جەتكىزىلگەن. كەيىنگى مالىمەت بويىنشا، زارداپ شەككەن ادامدار سانى 911-گە جەتتى. ەلدىڭ ىشكى ىستەر مينيسترلىگى ميتينگتى ۇيىمداستىرۋشىلار مەن پارتيا باسشىلارىن ءوز جاقتاستارىن ۇيلەرىنە قايتارۋعا شاقىردى. 6 -قازاندا قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ ەلدەگى ساياسي جاعدايعا بايلانىستى مالىمدەمە جاسادى.
اۆتور: ايان بەكەن ۇلى