بۇل تۋرالى كابار اگەنتتىگىنە سىلتەمە جاساپ قازاقپارات حابارلايدى.
«قازىرگى ۋاقىتتا قىرعىزستاندا ساياسي داعدارىس پەن ەلدەگى جاعدايدى تۇراقتاندىرۋ پروتسەسى ءجۇرىپ جاتىر. الايدا، وسى قيىن- قىستاۋ كەزەڭدە مەملەكەت مەنشىگىندەگى مەملەكەتتىك كومپانيالاردى، كاسىپورىنداردى زاڭسىز باسىپ الۋ ارەكەتتەرى باستالدى. دۇرىس باعىتتاعى ساياسي كۇشتەر مەن بەلسەندى ازاماتتىق قوعام ەلدەگى زاڭدىلىق پەن ءتارتىپتى ورناتۋعا تىرىسقان كەزدە، كەيبىر دەسترۋكتيۆتى كۇشتەر ساياساتكەرلەردىڭ، ساياسي پارتيالاردىڭ جانە قىلمىستىق اۆتوريتەتتەردىڭ اتىن جامىلىپ، مەملەكەتتىك نىسانداردى باسىپ الۋعا تىرىسۋدا. كوپتەگەن جەرلەردە توناۋ، ۇرلاۋ جانە رەيدەرلىك باسىپ الۋ پروتسەسى ءجۇرىپ جاتىر»، - دەدى ۆەدومستۆو.
وسى جاعدايعا بايلانىستى قوعامدىق كەڭەس جانە مەملەكەتتىك مۇلىكتى باسقارۋ قورى مىنانى حابارلادى: «قىرعىز رەسپۋبليكاسىنىڭ لەگيتيمدى جانە زاڭدى ۇكىمەتى قۇرىلعانعا دەيىن مەملەكەتتىڭ قاتىسۋ ۇلەسى بار اكسيونەرلىك قوعام (ا ق) مەم مەملەكەتتىك كاسىپورىندارىڭ (م ك) بارلىق باسشىلارى مىندەتىن ۋاقىتشا اتقارۋشى مارتەبەسىندە قالدىرىلسىن. ءوزىن مەملەكەتتىك وبەكتىنىڭ باسشىسى رەتىندە تاعايىنداعاندار، رەيدەرلىك باسىپ الۋدى جاساعاندار، الاياق دەپ ايىپتالىپ، قىرعىزستان زاڭناماسىنىڭ نورمالارىنا سايكەس جاۋاپقا تارتىلادى».
ايتا كەتسەك، بۇعان دەيىن «بىشكەك سۋۋكانالى» وندىرىستىك- پايدالانۋ باسقارماسىنىڭ (ءو پ ب) ستراتەگيالىق ماڭىزدى نىسانىن رەيدەرلىك جولمەن باسىپ الۋعا دايىندىق جۇرۋدە ەكەنىن حابارلادى. سونىمەن قاتار، 6 - قازان كۇنى «كىرگىزكومۇر» مەملەكەتتىك كاسىپورنىنىڭ كارا- كەچە فيليالىن 100-گە جۋىق بەلگىسىز ادام باسىپ العان. كومىر كەنىنە شابۋىلدى قىلمىس الەمىندە «ساياق» لاقاپ اتى بار م. قادىرقۇلوۆ ۇيىمداستىرعان. ولار كومىر ساتۋدان تۇسكەن 1,5 ميلليون- عا جۋىق سومدى (8,13 ميلليون تەڭگە شاماسىندا) فيليالدىڭ كاسسا قىزمەتكەرلەرىنەن تارتىپ العان.
ەسكە سالساق، 4 - قازان كۇنى قىرعىزستاندا جوگوركۋ كەنەشكە دەپۋتاتتاردى سايلاۋ ءوتتى. دەپۋتاتتىق مانداتقا 16 پارتيا ۇمىتكەرلىك ەتتى. داۋىس بەرۋدىڭ الدىن الا مالىمەتى بويىنشى، % 7 مەجەنى 4 پارتيا ەڭسەردى. 5 - قازان كۇنى سايلاۋ ناتيجەسىنە كوڭىلى تولماعان ءبىر توپ ادام ورتالىق الاڭدا ميتينگ ۇيىمداستىرىپ، ودان كەيىن اق ۇيگە بەتتەدى. ولاردى تارقاتۋ ءۇشىن ميليتسيا كوز جاساۋراتاتىن گاز، سۋاتقىش جانە گاز- شۋىلدى قۇرىلعىلار قولدانعان. بىشكەك ۋاقىتىمەن ساعات 22.00-دەگى ءمالىم بويىنشا، اۋرۋحاناعا زارداپ شەككەن 16 ادام جەتكىزىلگەن. كەيىنگى مالىمەت بويىنشا، زارداپ شەككەن ادامدار سانى 911-گە جەتتى.