بۇل تۋرالى قازاقپارات قىرعىز پرەزيدەنتىنىڭ باسپا ءسوز قىزمەتىنە سىلتەمە جاساپ حابارلايدى.
سوورونباي جەەنبەكوۆ ءوزىنىڭ كەزەكتى ۇندەۋىندە كەيبىر ساياسي كۇشتەردىڭ ارەكەتى سالدارىنان سوڭعى ءۇش كۇندە ەلدە ساياسي داعدارىس باستالعانىن ايتتى.
«بارلىق قىرعىزستاندىقتار ساياسي اۋىر جاعدايدى باستارىنان وتكىزۋدە. مەن وسى جاعدايدى رەتتەۋ تۋرالى سىزدەردىڭ تالاپتارىڭىزدى تولىق تۇسىنەمىن. مەن پرەزيدەنت رەتىندە داعدارىستىق ماسەلەلەردى شەشۋ باعىتتارىندا بارلىق كۇش- جىگەرىمدى سالاتىن بولامىن. وسى ماقساتتا ءتۇرلى ساياسي كۇشتەرمەن جەكە كەلىسسوزدەر وتكىزەمىن. ايتا كەتەيىن، قازىرگە دەيىن جاعدايدى رەتتەۋ ءۇشىن ءبىر دە ءبىر تاراپ كەلىسسوزدەر جۇرگىزەتىن ءبىرىڭعاي الاڭ ۇسىنعان جوق. سونداي- اق، ءتۇرلى لاۋازىمدى تۇلعالاردى قىزمەتتەن بوساتۋ جانە تاعايىنداۋ پروتسەسىن زاڭداستىرۋ قاجەت»، دەلىنگەن سوورونباي جەەنبەكوۆتىڭ كەزەكتى ۇندەۋىندە.
ەسكە سالايىق، جەكسەنبى، 4 - قازان كۇنى قىرعىزستاندا جوگوركۋ كەنەشكە دەپۋتاتتاردى سايلاۋ ءوتتى. دەپۋتاتتىق مانداتقا 16 پارتيا ۇمىتكەرلىك ەتتى. داۋىس بەرۋدىڭ الدىن الا مالىمەتى بويىنشى، % 7 مەجەنى 4 پارتيا ەڭسەردى. ال، 5 - قازان كۇنى سايلاۋ ناتيجەسىنە كوڭىلى تولماعان ءبىر توپ ادام ورتالىق الاڭدا ميتينگ ۇيىمداستىرىپ، ودان كەيىن اق ۇيگە بەتتەدى. ولاردى تارقاتۋ ءۇشىن ميليتسيا كوز جاساۋراتاتىن گاز، سۋاتقىش جانە گاز- شۋىلدى قۇرىلعىلار قولدانعان.
بىشكەك ۋاقىتىمەن ساعات 22.00-دەگى ءمالىم بويىنشا، اۋرۋحاناعا زارداپ شەككەن 16 ادام جەتكىزىلگەن. كەيىنگى مالىمەت بويىنشا، زارداپ شەككەن ادامدار سانى 911-گە جەتتى. ەلدىڭ ىشكى ىستەر مينيسترلىگى ميتينگتى ۇيىمداستىرۋشىلار مەن پارتيا باسشىلارىن ءوز جاقتاستارىن ۇيلەرىنە قايتارۋعا شاقىردى. 6 - قازاندا قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ ەلدەگى ساياسي جاعدايعا بايلانىستى مالىمدەمە جاسادى.