رەسەيدىڭ باتىس اسكەري وكرۋگى باسپا ءسوز قىزمەتىنىڭ مالىمەتىنشە، ءورت جەلتۋحينو ەلدى مەكەنى ماڭىنداعى قويمادا جانا باستاعان شوپتەن تارالعان.
«قاتتى جەل سوعىپ، ءورت ارتيللەريالىق وق- دارىلەردى ساقتاۋ الاڭىنا جايىلدى. اسكەري ءبولىمنىڭ شتاتتىق ءورت ءسوندىرۋ ءبولىمى وتپەن كۇرەسىپ باقتى، الايدا ءورتتى توقتاتۋ مۇمكىن ەمەس ەدى. قازىرگى ۋاقىتتا اسكەري ءبولىمنىڭ تەحنيكالىق اۋماعىندا وق- دارىلەردىڭ جارىلىپ جاتقانىن بايقاۋعا بولادى»، - دەدى باسپا ءسوز قىزمەتى.
ءورت كەزىندە ەشكىم زارداپ شەككەن جوق، قىزمەتكەرلەر مەن جەكە قۇرام ەۆاكۋاتسيالاندى. ءقازىر تجم كەلگەن ءورت ءسوندىرۋ توپتارىمەن بىرگە ءورتتى وقشاۋلاۋ جانە سوندىرۋگە كىرىستى. كۋاگەردىڭ ايتۋىنشا جانىپ جاتقان قويمالاردان ءۇش شاقىرىم جەردە ورنالاسقان كۋزمينكا-2 اۋىلىنىڭ تۇرعىندارى ەۆاكۋاتسيالانعان.
«جارىلىستارعا بايلانىستى كۋزمينكا-2 ەلدى مەكەنىنىڭ تۇرعىندارى ەۆاكۋاتسيالاندى. اۋىلدا بارلىعى 35 ءۇي بار، وندا 24 ادام تۇرادى»، - دەيدى اۋىل باسشىسى.