«ءبىزدىڭ كليماتتىق ايماقتىڭ كۇز- قىس كەزەڭى بارلىق ۋاقىتتا دا حالىق اراسىنداعى ءجىتى ريسپيراتورلىق ۆيرۋستىق ينفەكتسيالار مەن تۇماۋعا شالدىعۋ كورسەتكىشىنىڭ جوعارى بولۋىمەن ەرەكشەلەنەدى. جىل سايىن قازاقستاندا ج ر ۆ ي- گە شالدىعۋدىڭ 500 مىڭنان 1 ميلليونعا دەيىنگى جاعدايى تىركەلەدى. نەگىزىنەن ج ر ۆ ي- مەن 14 جاسقا دەيىنگى بالالار اۋىرادى. اعىمداعى ەپيدەميولوگيالىق ماۋسىم COVID-19 بويىنشا ورىن العان ەپيدەميولوگيالىق جاعدايعا بايلانىستى الاڭداۋشىلىق تۋدىرىپ وتىر. ءبىز تۇماۋدان كەيىنگى اسقىنۋدىڭ الدىن الۋ ءۇشىن قازىرگى ۋاقىتتا تۇماۋعا قارسى ۆاكتسيناتسيادان وتۋگە كەڭەس بەرەمىز. بيىل كوروناۆيرۋس ينفەكتسياسىنا قاتىستى ىندەتكە بايلانىستى ۆاكتسيناتسيالاۋ ناۋقانى ەكى اپتا بۇرىن، 2020 -جىلدىڭ 15-قىركۇيەگىندە باستالدى. ول ءۇشىن وڭىرلەردەگى العاشقى مەديتسينالىق كومەك ۇيىمدارىنىڭ بارلىعىندا 5 مىڭنان استام پۋنكت ۇيىمداستىرىلدى. جالپى، جرۆي مەن تۇماۋعا بايلانىستى ەپيدەميولوگيالىق ماۋسىم قازاندا باستالىپ، مامىرعا دەيىن جالعاسادى»، - دەيدى ول.
ونىڭ اتاپ وتۋىنشە، ۆاكتسيناتسيا جاساۋدان بولەك ج ر ۆ ي مەن تۇماۋدىڭ الدىن الۋدىڭ وزگە دە شارالارى بار. اتاپ ايتقاندا، مۇمكىندىگىنشە ادامدار كوپ جينالاتىن جەرلەرگە بارماعان ءجون. جابىق عيماراتتار مەن قوعامدىق ورىندارعا بارعاندا ءبىر رەت پايدالاناتىن ماسكا تاعۋ، جوتەلگەن نەمەسە تۇشكىرگەن كەزدە مۇرىندى شىنتاقپەن نەمەسە سۋلىقپەن بۇركەمەلەۋ كەرەك. اسىرەسە كوشەدەن جانە قوعامدىق كولىكتەن ۇيگە كەلگەننەن كەيىن قولدى سابىنمەن جاقسىلاپ جۋۋ، بولمە اۋاسىن جاقسىلاپ جەلدەتۋ قاجەت. قۇرامىندا س دارۋمەنى بار ونىمدەردى مولىنان تۇتىنىپ، سالاماتتى ءومىر سالتىن ۇستانۋ، تۇراقتى تۇردە دەنە تاربيەسىمەن اينالىسىپ، تازا اۋادا سەرۋەندەگەن دۇرىس. سونىمەن قاتار قوعامدىق دەنساۋلىقتى نىعايتۋ ورتالىعىنىڭ باسشىسى كوروناۆيرۋس ينفەكتسياسىن جۇقتىرىپ الماۋ ءۇشىن نە ىستەۋ كەرەكتىگىن دە ايتىپ بەردى.
«ەڭ الدىمەن، الدىن الا «اۋرۋ جۇقتىرىپ الامىن با» دەپ ۇرەيگە بوي الدىرماعان ءجون. ياعني، COVID-19-دىڭ جاڭا تولقىنى ورىن الۋ مۇمكىندىگىنە بايلانىستى كۇيزەلىسكە تۇسپەۋگە، ۇرەيلەنبەۋگە، قوبالجىماۋعا تىرىسۋ قاجەت. ۇرەي ءسىزدىڭ جاي- كۇيىڭىزدى ناشارلاتا تۇسەتىن جامان فاكتور سانالادى. ۇرەيلەنگەن كەزدە يممۋنيتەت تومەندەپ كەتۋى مۇمكىن. تۇماۋعا قارسى ۆاكتسيناتسيا بار. ال كوروناۆيرۋسقا قارسى ۆاكتسيناتسيانى بۇگىندە الەمنىڭ كوپتەگەن ەلدەرى عىلىمي تۇرعىدا ازىرلەپ، زەرتتەۋ جۇمىستارىن جۇرگىزۋ ۇستىندە. ەكىنشىدەن، تاجىريبە كوروناۆيرۋس ينفەكتسياسىن الدىن الۋدىڭ ناقتى ءارى ءتيىمدى شاراسى - قوعامدىق ورىنداردا ماسكا تاعۋ، الەۋمەتتىك اراقاشىقتى ساقتاۋ، قولدى ۇنەمى سابىنمەن جانە انتيسەپتيكپەن تازالاۋ ەكەندىگىن كورسەتىپ وتىر. ادام كوپ جينالاتىن جەرلەردە بارماۋعا كەڭەس بەرەمىز. ەگەر اسا قاجەتتىلىك بولىپ جاتسا، وندا مىندەتتى تۇردە مەديتسينالىق ماسكا تاعىپ، قولدى انتيسەپتيكپەن تازالاپ وتىرعان ءجون»، - دەدى جازيرا ەمبەرديەۆا.