«اباي الەمى» بايقاۋىنىڭ جەڭىمپازدارى جاريالاندى
بايقاۋدىڭ ماقساتى — قازاقتىڭ ۇلى ويشىلى ابايدىڭ مۇراسىن ناسيحاتتاۋ، دارىندى جاس عالىمداردى انىقتاۋ جانە قولداۋ، ولاردىڭ جۇمىسىن ناسيحاتتاۋعا كومەك كورسەتۋ.
«بۇگىنگى ءبىزدىڭ مىندەتىمىز - جاس عالىمداردى قولداۋ، ولاردىڭ شىعارماشىلىق الەۋەتىن ىنتالاندىرۋ ءۇشىن جاعداي جاساۋ. جوبانىڭ وزەكتىلىگىن اتاي وتىرىپ، ءبىز «اباي الەمى» بايقاۋىن جىل سايىن وتكىزۋدى جوسپارلاپ وتىرمىز» ،-دەدى نۇرسۇلتان نازاربايەۆ قورىنىڭ اتقارۋشى ديرەكتورى قانات جۇمابايەۆ.
كونكۋرسقا رەسپۋبليكانىڭ ءار ايماعىنان 100 دەن استام عىلىمي جۇمىستار كەلىپ ءتۇستى. قازىلار القاسى ماقالانىڭ وزەكتىلىگىن، وي- تۇجىرىمداردىڭ جاڭاشىلدىعىن، يدەيالاردىڭ ءتۇپنۇسقالىعى مەن بايانداۋ جۇيەلىلىگىن جانە اۆتوردىڭ ويلاۋ دەربەستىگىن باعالادى.
قازىلار القاسىنىڭ قۇرامىندا فيلولوگيا عىلىمدارىنىڭ كانديداتى، اباي اتىنداعى قازۇپۋ جانىنداعى «اباي تانۋ عىلىمي- زەرتتەۋ ورتالىعىنىڭ» ديرەكتورى جابال شويىنبەت، جازۋشى، قازاقستان جازۋشىلار وداعىنىڭ مۇشەسى، ق ر ۇلتتىق كىتاپحاناسىنىڭ عىلىمي حاتشىسى بولات جۇنىسبەكوۆ، اقىن، قازاقستان جازۋشىلار وداعىنىڭ مۇشەسى، «Abaialemi.kz» ونلاين ەنتسيكلوپەدياسىنىڭ شەف- رەداكتورى قايسار قاۋىمبەك سىندى بەلگىلى قوعام قايراتكەرلەرى، ابايتانۋشى عالىمدار بار.
ستۋدەنتتەر اراسىندا بايقاۋ جەڭىمپازى، ارنايى ديپلوم مەن 300000 تەڭگە كولەمىندەگى سىيلىقتىڭ يەگەرى ءال- فارابي اتىنداعى قازۇۋ- دىڭ Ⅱ كۋرس ستۋدەنتى ازىمبەك قويلىباي بولدى. ەكىنشى ورىن ءۇشىن ارنايى ديپلوم مەن 200000 تەڭگەلىك سىياقى ەۋرازيا گۋمانيتارلىق ينستيتۋتىنىڭ IV كۋرس ستۋدەنتى اتاباي قۋانىشوۆ پەن ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ Ⅱ كۋرس ستۋدەنتى عازيزوۆ نۇرايعا بەرىلدى. ءۇشىنشى ورىنعا جانە 100000 تەڭگە كولەمىندەگى سىيلىققا ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ IV كۋرس ستۋدەنتى نازگۋل ايسەنوۆا، ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ Ⅲكۋرس ستۋدەنتى گۇلسىماي سايرامبەك، نازاربايەۆ ۋنيۆەرسيتەتىنىڭ Ⅱ كۋرس ستۋدەنتى ءمولدىر بيجانوۆا يە بولدى.
ماگيسترانتتار اراسىندا ش. ەسەنوۆ اتىنداعى كاسپيي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ I كۋرس ماگيسترى مۋستافا شوحايەۆ جەڭىمپاز اتانىپ، 400000 ت گ جۇلدەگە يە بولدى. ءال- فارابي اتىنداعى قازۇۋ- دىڭ Ⅱ كۋرس ماگيسترى اباي مىرزاعالي مەن قۇرمانعازى اتىنداعى قازاق ۇلتتىق كونسەرۆاتورياسىنىڭ Ⅱ كۋرس ماگيسترانتى شەرحان مۋحامبەتجانوۆ ەكىنشى ورىندى يەلەنىپ، ءارقايسىسى 300000 تەڭگەدەن سىياقى الدى. ءۇشىنشى ورىن يەگەرلەرى «تۇران- استانا» ۋنيۆەرسيتەتىنىڭ I كۋرس ماگيسترى قالياكبار ۇسەمحانعا، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ Ⅱ كۋرس ماگيسترى اقبوتا قاجىبەكوۆا مەن I كۋرس ماگيسترى زەينەگۋل جۋمابەكوۆاعا 200000 تەڭگەدەن بەرىلدى.
ۇزدىك عىلىمي جۇمىستار «Abaialemi.kz» پورتالىندا جاريالانادى.