«قازىر قۇس ەتى بويىنشا ءوز ءوندىرىسىمىزدىڭ كولەمى ىشكى نارىق قاجەتتىلىگىنىڭ 58 پايىزىن عانا جابادى. ىشكى نارىقتى تولىقتىرۋ ءۇشىن قۇس ەتىن ءوندىرۋ قۋاتىن قوسىمشا 171 مىڭ تونناعا ارتتىرۋ قاجەت. بۇل مىندەت جاڭا قۇس فابريكالارىن ىسكە قوسۋ، سونداي- اق قۇس فابريكالارىنىڭ قولدانىستاعى قۋاتتىلىقتارىن كەڭەيتۋ ەسەبىنەن 2023 جىلدىڭ سوڭىنا دەيىن ىسكە اسىرىلاتىن بولادى. وتاندىق ءوندىرىس ەسەبىنەن قۇس ەتى يمپورتى كولەمىن قىسقارتۋ ەل ەكونوميكاسىندا جىل سايىن شامامەن 177 ميلليون ا ق ش دوللارىن نەمەسە 77 ميلليارد تەڭگەنى ساقتاپ قالۋعا مۇمكىندىك بەرەدى، ولار قازىر ۆاليۋتالىق ءتۇسىم تۇرىندە باسقا ەلدەرگە كەتۋدە»، - دەدى مينيستر ۇكىمەت وتىرىسىندا.
ونىڭ سوزىنە قاراعاندا، اتالعان مىندەتتى ورىنداۋ ءۇشىن جالپى قۋاتى 285 مىڭ توننا قۇس ەتىن وندىرەتىن 19 قۇس فابريكاسى، ونىڭ ىشىندە بيىل جالپى قۋاتى 70 مىڭ توننا بولاتىن 6 قۇس فابريكاسى، 2021 - 2023 -جىلدارى جالپى قۋاتى 215 مىڭ توننا بولاتىن 13 قۇس فابريكاسى ىسكە قوسىلاتىن بولادى. بۇل ىشكى نارىق قاجەتتىلىگىن تولىق كولەمدە قامتۋعا مۇمكىندىك بەرەدى.
«جوعارىدا اتالعان 13 ينۆەستيتسيالىق جوبانى ىسكە اسىرۋ ءۇشىن قوسىمشا 147 ميلليارد تەڭگە، ونىڭ ىشىندە 69 ميلليارد تەڭگە كرەديتتىك رەسۋرستار قاجەت ەتىلەدى. جوبالاردى تابىستى ىسكە اسىرۋ ءۇشىن مىناداي ماسەلەلەردى جەدەل شەشۋ قاجەت: ينجەنەرلىك ينفراقۇرىلىم جۇرگىزۋگە قاراجات ءبولۋ، قۇس ەتىن ءوندىرۋدى سۋبسيديالاۋعا جانە ينۆەستيتسيالىق سۋبسيديالارعا قاراجات ءبولۋ، قۇس ەتى يمپورتىنا ارنالعان تاريفتىك كۆوتالاردى ءبولۋ تەتىگىن وڭدەۋشى كاسىپورىنداردىڭ پايداسىنا وزگەرتۋ، ازىق ءوندىرۋ ءۇشىن جەر ءبولۋ»، - دەدى س. وماروۆ.
اۆتور: رۋسلان عابباسوۆ