«قازىرگى ۋاقىتتا رەسپۋبليكادا جالپى الاڭى 35,1 مىڭ گەكتاردا جالپى كولەمى 216,5 مىڭ توننا الما وندىرۋمەن 34 ءىرى كومپانيا، 195 ورتا، 1370 شاعىن شارۋاشىلىق جانە جەكە قوسالقى شارۋاشىلىق اينالىسادى. بۇل رەتتە ونەركاسىپتىك قارقىندى باقتاردا المانىڭ تۇسىمدىلىگى گەكتارىنا 40-45 توننانى، ال ۇساق جانە جەكە قوسالقى شارۋاشىلىقتاردا گەكتارىنا 7-10 توننانى قۇرايدى»، - دەدى مينيستر ۇكىمەت وتىرىسىندا.
ونىڭ ايتۋىنشا، الما باقتارىنىڭ الاڭدارىن ۇلعايتۋ بويىنشا باستى نازاردى ءىرى جانە ورتا شارۋاشىلىقتارعا اۋدارۋ كەرەك، ال ۇساق شارۋاشىلىقتار مەن جەكە قوسالقى شارۋاشىلىقتاردى كووپەراتيۆتەرگە بىرىكتىرۋ قاجەت.
«الماعا دەگەن قاجەتتىلىك كولەمى 344,3 مىڭ توننانى، يمپورت 128 مىڭ توننانى قۇرايدى. ىشكى نارىقتى 6,6 مىڭ گەكتار جاڭا قارقىندى باقتار وتىرعىزۋ ەسەبىنەن مولايتۋ بولجانىپ وتىر. جاڭا باقتار وتىرعىزۋدى نەگىزگى باق شارۋشىلىعىمەن اينالىساتىن الماتى، جامبىل جانە تۇركىستان وبلىستارىنا، شىمكەنت قالاسىنا شوعىرلاندىرۋ ۇسىنىلادى. اتالعان وڭىرلەر بويىنشا جۇمىس جۇرگىزىلىپ جاتقانىن اتاپ ءوتۋ قاجەت. الداعى 3 جىلعا ارنالعان وتىرعىزۋ الاڭى 5,5 مىڭ گەكتار بولاتىن جوبا پۋلى بار. جوسپارلانعان الاڭدار جوبالارمەن قامتاماسىز ەتىلمەگەن وڭىرلەر بويىنشا ءتيىستى جۇمىستار جۇرگىزۋ قاجەت. بۇل جەردە تۇركىستان، الماتى جانە جامبىل وبلىستارىندا 5 مىڭ گەكتار باق وتىرعىزۋدى كوزدەپ وتىرعان «گوكنۋر گيدا» تۇرىك كومپانياسىمەن جوبانى ىسكە اسىرۋىنىڭ ماڭىزدىلىعىنا ەرەكشە نازار اۋدارعىم كەلەدى»، - دەدى س. وماروۆ.
ونىڭ سوزىنە قاراعاندا، تولىق جەمىس بەرۋگە بىرتىندەپ شىعا وتىرىپ، جىلىنا ورتا ەسەپپەن 2 - 2,2 مىڭ گەكتار باق وتىرعىزۋ الما تاپشىلىعىن تولىعىمەن جابۋعا جانە 2024 -جىلى تولىق ءوزىن- ءوزى قامتاماسىز ەتۋگە مۇمكىندىك بەرەدى.
اۆتور: رۋسلان عابباسوۆ