وسى جىلدىڭ قىركۇيەك ايىنىڭ باسىندا قازاقستاندا 24,2 ميلليون ۇيالى بايلانىس ابونەنتى بولدى. بۇل وتكەن جىلدىڭ ءدال وسىنداي كەزەڭىندەگى ابونەنتتەر سانىنان (25,9 ميلليون ابونەنت) 6,5 پايىزعا از. ولاردىڭ 63,3 پايىزى نەمەسە 15,3 ميلليونى ينتەرنەتكە قوسىلعان. تىركەلگەن ينتەرنەت ابونەنتتەر سانىنىڭ دا قىسقارۋى بايقالادى. ءبىر جىلدا ولاردىڭ سانى 1,2 پايىزعا، 2,5 ميلليون ابونەنتكە دەيىن ازايدى. ۇيالى بايلانىس جانە تىركەلگەن ينتەرنەت ابونەنتتەرى جالپى سانىنىڭ تومەندەۋىنە قاراماستان قازاقستاندا بايلانىس قىزمەتتەرىنىڭ كولەمى ايتارلىقتاي ۇلعايدى.
ماسەلەن، وسى جىلدىڭ قاڭتار- تامىزىندا ەلىمىزدىڭ تەلەكوممۋنيكاتسيالىق كومپانيالارىنىڭ بايلانىس قىزمەتىنەن العان كىرىستەرى جىل ىشىندە 8,3 پايىزعا ارتىپ، 574,2 ميلليارد تەڭگەنى قۇرادى. وتكەن جىلى 519,9 ميلليارد تەڭگە بولعان ەدى. كىرىستەر ءوسىمىنىڭ نەگىزگى سەبەپتەرىنىڭ ءبىرى ينتەرنەت- پروۆايدەرلەر مەن ۇيالى بايلانىس وپەراتورلارى تاريفىنىڭ كوتەرىلۋى بولىپ وتىر.
ايتالىق، بيىل تامىزدا 2019 -جىلدىڭ تامىزىمەن سالىستىرعاندا ينتەرنەت تاريفى 2,6، ۇيالى بايلانىس قىزمەتتەرى 1,7 پايىزعا قىمباتتادى. ينتەرنەت ۇسىنۋ قىزمەتى سالاسىنداعى تەلەكوممۋنيكاتسيالىق كومپانيالاردىڭ كىرىستەرى جىل ىشىندە 13,2 پايىزعا ءوسىپ، 213,4 ميلليارد تەڭگەگە جەتتى. بۇل تەلەكوم نارىعىنداعى قىزمەتتەردىڭ جالپى كولەمىنىڭ 37,2 پايىزىن قۇرايدى. دەگەنمەن، ۇيالى بايلانىس قىزمەتتەرى كولەمى دە وتكەن جىلمەن سالىستىرعاندا 1,5 پايىزعا ارتىپ,151,7 ميلليارد تەڭگەگە جەتىپ وتىر. ونىڭ ىشىندە حالىققا كورسەتىلەتىن ۇيالى بايلانىس قىزمەتتەرى اقشاعا شاققاندا جىل ىشىندە بىردەن 5,1 پايىزعا كوبەيىپ، 108,1 ميلليارد تەڭگەگە جەتتى. وڭىرلىك شەكتە بايلانىس قىزمەتتەرى كولەمىنىڭ 80 پايىزى الماتى مەن نۇر- سۇلتان قالاسىنا تيەسىلى بولىپ تۇر.
ق ر ۇ ە م ستاتيستيكا كوميتەتىنىڭ مالىمەتىنشە، ۇيالى بايلانىس كولەمى ۇيالى بايلانىس وپەراتورلارى تىركەلگەن مەكەنجايلار اراسىندا بولىنگەن. اتاپ ايتقاندا، الماتىداعى بايلانىس قىزمەتتەرىنىڭ كولەمى 336,6 ميلليارد تەڭگەنى، ال نۇر- سۇلتاندا 121 ميلليارد تەڭگەنى قۇرايدى. سونىمەن قاتار سەكتورداعى قىزمەت كورسەتۋ كولەمى بويىنشا توپ-5 وڭىرگە قاراعاندى (13,8 ميلليارد تەڭگە)، شىعىس قازاقستان (13,2 ميلليارد) جانە الماتى (9,9 ميلليارد) وبلىستارى كىرەدى.
اۆتور: مارلان جيەمباي