باسقارمانىڭ مالىمەتىنشە، ءتورت جىلدان بەرى 40 توننالىق تەمىر كونتەينەردە تۇرىپ كەلگەن مەكتەپ ءمۇعالىمى جاڭا ۇيگە قونىستانعان. باسقارماعا قاراستى «زەكەت» قورىنىڭ «ەل ۇلەسى - پاتەرگە» جوباسى اياسىندا نۇر- سۇلتان وكىلدىگىنىڭ ۇيىتقى بولۋىمەن 279- باسپانانىڭ كىلتى مايا تسوپون قىزىنا ءتول مەرەكەسىندە جاسالعان تەڭدەسسىز سىيلىق بولدى. وسىدان ءتورت جىل بۇرىن جۇبايى اسكەر كالەمحان ۇلى باسىنان جاراقات الىپ، ەڭبەككە جارامسىز بولىپ قالعالى وتباسى تەمىر كونتەينەردى پانالاپ كەلگەن بولاتىن. سىرقات كۇيەۋى مەن ەكى بالاسىن اسىراۋ وڭايعا سوقپاسا دا، قوياندى مەكتەبىندەگى ۇستازدىق قىزمەتىنەن قول ۇزبەگەن. قيىندىقپەن جالعىز الىسقان قايسار جانعا قۇرمەت رەتىندە ۇستازدار كۇنىنە ورايلاستىرىلىپ، كالەمحانوۆتار وتباسىنا توسىنسىي جاسالدى يگىلىكتى شاراعا بەلگىلى تەلەجۇرگىزۋشى، سەناتور دانا نۇرجىگىت ارنايى قاتىسىپ، مەكتەپ ءمۇعالىمىنىڭ قۋانىشىمەن ءبولىسىپ قايتتى.
جاڭا باسپانادا جايىلعان داستارحان باسىندا ىزگى تىلەكتەر ايتىلىپ، قازاقى داستۇرگە ساي جاڭا شاڭىراققا قاجەتتى سىيلىقتار تارتۋ ەتىلدى. يگى شاراعا دەمەۋشىلىك تانىتىپ، سۇتتەي ۇيىعان ءبىر وتباسىنىڭ باقىتتى بولۋىنا سەپتىگىن تيگىزگەن ەرلىك حايدار ۇلى باستاعان ەل اعالارى دا قۋانىشتىڭ باسىنان تابىلىپ، ىزگى تىلەكتەرىن ءبىلدىردى.