پاكياو ماكگرەگورمەن جەكپە- جەك وتكىزۋگە كەلىستى

نۇر-سۇلتان. قازاقپارات - اڭىزعا اينالعان فيليپپيندىك بوكسشى مەنني پاكياو UFC جۇلدىزى كونور ماكگرەگورمەن جۇدىرىقتاسۋعا دايىن، دەپ حابارلايدى Prosports.kz.

بوكسشىنىڭ تەك ءبىر شارتى بار. پاكياونىڭ پروموۋتەرلىك كومپانياسى وسى كەشتى ۇيىمداستىرۋشىلاردىڭ ءبىرى بولۋى كەرەك.

سونىمەن بىرگە، بوكسشىنىڭ ءوزى ماكگرەگوردىڭ مەنەدجەرى Paradigm Sports Management كومپانياسىمەن بايلانىسىن جوققا شىعارادى. پاكياونىڭ ايتۋى بويىنشا، ول ءوزىنىڭ جەكە باسقارۋشى Pac Sports and Entertainment ۇيىمىن قۇردى.

مەنىڭ قازىرگى ۋاقىتتا Paradigm Sports Management-پەن كەلىسىمشارتىم جوق. مەن ءوزىمنىڭ Pac Sports and Entertainment كومپانيامدى قۇردىم. كوبى كونورمەن جەكپە-جەكتى كورگىسى كەلەدى. بۇل تىلەكتى ورىنداۋعا دايىنمىن، - دەدى مەنني The Daily Mail-گە بەرگەن سۇحباتىندا.