گولوۆكيننىڭ كەلەسى جەكپە-جەگى قاشان وتەتىنى بەلگىلەندى

نۇر-سۇلتان. قازاقپارات - ESPN Deportes مالىمەتى بويىنشا، IBF جانە IBO نۇسقالارى بويىنشا ورتا سالماقتا الەم چەمپتونى گەننادي گولوۆكيننىڭ (40-1-1، 35 ك و) كەلەسى جەكپە-جەگى 20 -قاراشادا وتەدى، دەپ حابارلايدى قازاقپارات Sports.kz سايتىنا سىلتەمە جاساپ.

GGG قارسىلاسى - IBF جەلىسى بويىنشا مىندەتتى ۇمىتكەر پولياك بوكسشىسى كاميل شەرەمەتا (21-0، 5 ك و). قازاقستاندىق كورەرمەندەر جەكپە-جەكتى 21-قاراشا سەنبى كۇنى تاڭەرتەڭ تاماشالاي الادى.

شارانى ۇيىمداستىرۋشىلاردىڭ دەرەككوزدەرى بويىنشا DAZN ستريمينگ پلاتفورماسى جىلدىڭ سوڭعى اپتالارىندا تەرەنس كروۋفورد، ەررول سپەنس، ەنتوني دجوشۋا، ميگەل بەرچەلت، وسكار ۆالدەس، تايسون فۋري، سونداي-اق مايك تايسوننىڭ روي دجونسپەن بولاتىن ايقاسى قامتىلعان تىعىز كەستەنى ەسكەرە وتىرىپ، جۇما كۇندەرى بوكس شوۋلارىن وتكىزۋدى جوسپارلاپ وتىرعانىن حابارلادى. بۇعان دەيىن گولوۆكين- شەرەمەتانىڭ جەكپە-جەگى 21-قاراشا (قازاقستان ۋاقىتى بويىنشا 22-قاراشا كۇنى تاڭەرتەڭ) بولاتىن. وتەتىن ورنى - لوس-اندجەلەس ماڭىنداعى كارسون.

اۆتور: اياۋلىم التىنبەك