بۇل تۋرالى ءتيىستى زاڭ جوباسىن تالقىلاۋ كەزىندە ءماجىلىس دەپۋتاتى ءابدىماناپ بەكتۇرعانوۆ ءمالىم ەتتى، دەپ حابارلايدى قازاقپارات ءتىلشىسى.
«قولدانىستاعى زاڭعا سايكەس، مەملەكەتتىك تاپسىرىس بويىنشا ءبىلىم العان تۇلەكتەر، ياعني مەديتسينالىق ءارى پەداگوگيكالىق ماماندىقتار اياسىندا وقۋدى بىتىرگەننەن كەيىن ولار ءۇش جىل جۇمىسپەن وتەۋى كەرەك. گرانتپەن وقۋعا ءتۇسىپ، وسى گرانتپەن وقۋدى اياقتاعان تۇلەكتەرگە قاتىستى ەشقانداي سۇراقتار جوق. ال ەگەر العاشقى كەزدە گرانتپەن وقۋعا ءتۇسىپ، كەيىن اقىلى نەگىزگە اۋىساتىن بولسا نەمەسە اقىلى نەگىزدەن گرانتقا اۋىسسا، بۇل تۇرعىدا ءتيىستى سۇراقتار بار»، - دەدى دەپۋتات ءماجىلىستىڭ جالپى وتىرىسىندا.
مىسالى، ستۋدەنت العاشقىدا گرانتقا وقۋ ءتۇسىپ، سوڭعى كۋرستا اقىلى نەگىزگە اۋىسادى. ول اقىلى نەگىزدە وقۋدى ءتامامداعاننان كەيىن، تۇلەكتەر ەكبەكپەن وتەۋمەن قامتىلمايدى.
«سونىمەن قاتار، اقىلى نەگىزدە وقىپ، وقۋ ۇلگەرىمى جاقسى ستۋدەنتتەر ءۇشىنشى كۋرستا گرانتقا اۋىسىپ جاتادى. ولار وقۋدى گرانت ەسەبىنەن بىتىرگەننەن كەيىن، بۇل ستۋدەنتتەر ءۇش جىل جۇمىسپەن وتەۋگە ءتيىستى بولادى. وسىعان بايلانىستى مەملەكەتتىك تاپسىرىس كەزىندە بيۋدجەت قاراجاتىنان قانشا جىل وقىسا، تەك سول كەزەڭدى ەڭبەكپەن وتەيدى»، - دەپ ءتۇسىندىردى ءا. بەكتۇرعانوۆ.
بۇدان بۇرىن حابارلانعانداي، پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
ايتا كەتەيىك، جوعارى وقۋ ورنىن ءبىتىرۋشىنىڭ مەملەكەتتىك ءبىلىم بەرۋ تاپسىرىسىندا وقۋ ۇزاقتىعىنا پروپورتسيونالدى تۇردە ەڭبەكپەن وتەۋ مەرزىمىن بەلگىلەۋ ارقىلى شەشۋ ۇسىنىلادى. وسىلايشا، مەملەكەتتىك ءبىلىم بەرۋ تاپسىرىسىندا ءبىلىم العان ازاماتتار بۇكىل كەزەڭدە - بارلىق ءۇش جىلدى دا جۇمىسپەن وتەيتىن بولادى. ال ءبىلىم الۋشىلار ءىشىنارا، ياعني ءبىر بولىگىن اقىلى نەگىزدە - مەملەكەتتىك بيۋدجەت ەسەبىنەن وقۋ كەزەڭىنە مولشەرلەس وتەيتىن بولادى.