وزبەكستاندا تۇراتىن قازاق وتانداستارىنان كومەك سۇرادى
بۇل تۋرالى «حابار 24» تەلەارناسىنىڭ سيۋجەتىندە ايتىلعان.
جاقسىلىق جورىقبايەۆ بىرنەشە جىل بويى شىرشىق قالاسىندا قازاقتىڭ سالت-داستۇرلەرى مەن مادەنيەتىن ناسيحاتتاۋ ءۇشىن قازاق مادەني ورتالىعىنىڭ قۇرىلىسىمەن اينالىسىپ كەلەدى. جوبا ءۇشىن ەر ادام ءوز بيزنەسىن ساتقان، ءتىپتى بانكتەن نەسيە الىپتى. ءبىراق قۇرىلىستى توقتاتۋعا تۋرا كەلگەن: قاراجات جەتپەدى.
«ءبىز مۇندا دومبىرا، بي جانە «جايدارمان» ۇيىرمەلەرىن وتكىزگىمىز كەلەدى. سونداي-اق، مۇندا ءوزىمىزدىڭ فولكلورلىق انسامبلىمىز بولادى»، - دەيدى جاقسىلىق جورىقبايەۆ.
ونىڭ ايتۋىنشا، مادەني ورتالىق قازاقتاردىڭ باۋىرمالدىعى مەن اۋىزبىرشىلىگى تۋرالى وي ءوربيتىن ورىنعا اينالۋى مۇمكىن.
«ءبىز جاستارىمىزعا ەجەلگى داستۇرلەردى بىلۋگە جانە ولاردى ۇمىتپاۋدى ۇيرەتۋىمىز كەرەك. سوندىقتان بۇل ورتالىقتىڭ قۇرىلىسى وتە قاجەت. مەن ولاردىڭ ءبارىن وسىندا جيناعىم كەلەدى، پايدالى ىسپەن اينالىسسا دەيمىن، قۇر جۇرمەي. مەن ءوز ادەت- عۇرىپتارىمدى زەرتتەپ، اتالاردىڭ جەتى ۇرپاعىن بىلگىم كەلەدى. ول ءۇشىن اكادەميكتەردى، پروفەسسورلاردى شاقىردىم»، - دەيدى جورىقبايەۆ.
«ەگەر بۇل مادەني ورتالىق سالىناتىن بولسا، ول شىرشىق قالاسىنىڭ عانا ەمەس، بۇكىل تاشكەنت وبلىسىنىڭ قازاق ۇلتتىق ورتالىعى بولا الادى. مۇنداي ورتالىق تاشكەنتتە دە، جالپى وزبەكستاندا دا جوق»، - دەدى جەرگىلىكتى تۇرعىن مۇقان مەنتايەۆ.
«ەگەر قازاقستانداعى قانداس باۋىرلارىمىزدىڭ اراسىندا ءبىزدىڭ باستامامىزدى قولداعىسى كەلەتىندەر بولسا، ءبىز وتە ريزا بولار ەدىك. سەبەبى ولار ءبىزدى ەمەس، وزبەكستاندا تۇراتىن بارلىق قازاقتى قولدايدى»، - دەدى ول.
جاقسىلىق جورىقبايەۆتىڭ ايتۋىنشا، ول قۇرىلىسقا 120 مىڭ دوللاردان استام قاراجات جۇمساعان.
«بۇل جۇمىستى اياقتاۋ ءۇشىن تاعى 30 مىڭ جەتىسپەيدى. ەگەر قازاقستان حالقى ءبىزدى قولداسا، ءبىز جوبانى جۇزەگە اسىرا الامىز، ونى جۇزەگە اسىرۋ ءۇشىن كوپ كۇش جۇمسادىق»، - دەدى شىرشىق قالاسىنداعى قازاق مادەني ورتالىعىنىڭ ءتوراعاسى.
Tengrinews.kz