الەكساندر لۋكاشەنكو بەلارۋس پرەزيدەنتى قىزمەتىنە رەسمي كىرىستى

مينسك. بەلتا - قازاقپارات - الەكساندر لۋكاشەنكو بەلارۋس پرەزيدەنتى قىزمەتىنە كىرىستى. ۇلىقتاۋ ءراسىمى بەلارۋستىڭ تاۋەلسىزدىك سارايىندا ءوتتى. قازاقپارات بۇل تۋرالى بەلتا اقپارات اگەنتتىگىنە سىلتەمە جاساپ حابارلايدى.

پرەزيدەنتتى ۇلىقتاۋ راسىمىنە بىرنەشە جۇزدەگەن ادام شاقىرىلعان. ولاردىڭ اراسىندا جوعارى لاۋازىمدى تۇلعالار، وكىلدەر پالاتاسىنىڭ دەپۋتاتتارى مەن رەسپۋبليكا كەڭەسىنىڭ مۇشەلەرى، مەملەكەتتىك ورگاندار مەن ۇيىمدار، جەرگىلىكتى اتقارۋشى جانە ۇيلەستىرۋشى ورگاندار، رەسپۋبليكالىق بۇقارالىق اقپارات قۇرالدارىنىڭ باسشىلارى، عىلىم، مادەنيەت جانە سپورت قايراتكەرلەرى بولدى.

وڭ قولىن كونستيتۋتسيا كىتابىنا قويعان الەكساندر لۋكاشەنكو انتىن تۋعان تىلىندە بەردى. ا. لۋكاشەنكو انت قابىلداۋ تۋرالى اكتىگە قول قويعان سوڭ، بەلارۋس ورتالىق سايلاۋ جانە رەسپۋبليكالىق رەفەرەندۋمداردى وتكىزۋ كوميسسياسىنىڭ ءتوراعاسى ليديا ەرموشينا وعان بەلارۋس رەسپۋبليكاسى پرەزيدەنتىنىڭ كۋالىگىن تابىستادى.

ەسكە سالايىق، بەلارۋستا پرەزيدەنت سايلاۋى 9 - تامىز كۇنى ءوتتى. و س ك مالىمەتىنشە، الەكساندر لۋكاشەنكو ءۇشىن سايلاۋشىلاردىڭ 80,1 پايىزى داۋىس بەرگەن. ەل بويىنشا سايلاۋعا قاتىسۋ 84,28 پايىزدى قۇرادى. 17 - تامىزدا بەلارۋس ۇكىمەتى جاڭادان سايلانعان پرەزيدەنت الدىندا وتستاۆكاعا كەتىپ، 20 - تامىزدا لۋكاشەنكو ەل پرەمەر- ءمينيسترىن تاعايىنداپ، ۇكىمەت قۇرامىن بەكىتتى.

اۆتور: زارينا تۋعانبايەۆا