كوروناۆيرۋستىڭ اۋىر تۇرىنە شالدىققانداردىڭ ەستە ساقتاۋ قابىلەتى تومەندەيدى - مىڭجىلقى بەردىحودجايەۆ
بۇل تۋرالى قازاقپارات تىلشىسىنە بەرگەن سۇحباتىندا نەيروحيرۋرگ مىڭجىلقى بەردىحودجايەۆ ءمالىم ەتتى.
«كوروناۆيرۋستىڭ اۋىر تۇرىنە شالدىققان ناۋقاستاردا وتتەگى جەتىسپەيدى. سالدارىنان ول نەرۆتىك جۇيەلەرگە، ونىڭ ىشىندە ميدىڭ جۇمىسىنا تەرىس اسەر ەتەدى. سوندىقتان دەرتتى اۋىر وتكەرگەن ادامداردىڭ ەستە ساقتاۋ جادى ناشارلايدى. بۇل ناۋقاستاردىڭ جاس ەرەكشەلىگىنە قارامايدى. دەگەنمەن، اتالعان پاتولوگيا كوروناۆيرۋسقا شالدىققانداردىڭ دا عانا كەزدەسەدى. سونداي- اق ىندەت ءدام، ءيىس سەزۋ مۇشەلەرىنىڭ نەرۆتىڭ جۇيەلەرىن زاقىمدايدى. ودان تولىق ساۋىعۋ ءۇشىن كەمىندە 2 اي، ال ەڭ ۇزاق دەگەندە 6 اي ۋاقىت كەرەك. كەيبىر دەرەكتەر بويىنشا، ءيىس سەزۋ مۇشەسى دەرتتەن ايىققان سوڭ دا مۇلدە قالپىنا كەلمەۋى مۇمكىن»، - دەدى نەيروحيرۋرگ مىڭجىلقى بەردىحودجايەۆ.
سونىمەن قاتار، نەيروحيرۋرگ كوروناۆيرۋسپەن اۋىرعان ادامداردىڭ تولىق ساۋىعۋى ءۇشىن قولدانىلۋى ءتيىس شارالار تۋرالى ايتىپ بەردى.
«ينفەكسيانىڭ جەڭىل تۇرىمەن اۋىرعان ازاماتتاردىڭ وكپەسى شامامەن 6 اي كولەمىندە تولىق قالپىنا كەلەدى. ال اۋىر تۇرىنە شالدىققانداردى ەمدەۋگە ودان دا كوپ ۋاقىت كەتەدى. وعان قوسا، ەم- دومنان كەيىن ولاردىڭ وكپەسىندە تىرتىق قالادى. سوندىقتان بۇل كاتەگورياداعى ناۋقاستارعا ەرەكشە كۇتىم قاجەت. سەبەبى ولاردىڭ يممۋنيتەتى ناشار، تيىسىنشە ونىڭ وزگە دە اۋرۋلاردى جۇقتىرۋى قاۋىپتىلىگى جوعارى. مۇنداي ادامدارعا جەڭىل گيمناستيكامەن اينالىسقان، قوسىمشا ۆ1، ۆ6، ۆ12 جانە د دارۋمەندەرىن ىشكەن وتە ءتيىمدى. جۇگىرۋ، سەكىرۋ جانە ت. ب. اۋىر جاتتىعۋلار جاساۋدىڭ قاجەتى جوق. ولاردىڭ وكپەسى كوپ كۇش تۇسەتىن قيمىلدارعا ءالى دايىن ەمەس. ەڭ پايدالىسى - كاراوكەمەن ءان ايتۋ. بۇل ساتتە وكپەدە ۆيبراتسيا بولادى. ول كلەتكالاردى تەز قالىپقا كەلتىرەدى جانە ءان ايتقان ادامنىڭ كوڭىلى كوتەرىلەدى»، - دەپ اتاپ ءوتتى مىڭجىلقى بەردىحودجايەۆ.
ەسكە سالا كەتەيىك، وتكەن تاۋلىكتە ەل بويىنشا كوروناۆيرۋس ينفەكسياسىنىڭ بەلگىلەرى بار پنەۆمونيانىڭ 364 جاعدايى تىركەلدى.