بۇل تۋرالى پروۆينتسيانىڭ COVID-19-عا قارسى كۇرەس جونىندەگى باسقارۋشى جۇمىس توبىنا سىلتەمە جاساعان «پەنپاي» گازەتى جازدى، دەپ حابارلايدى قازاقپارات.
باسقارۋشى جۇمىس توبىنىڭ مالىمدەمەسىندە يۋننان پروۆينتسياسىنداعى شەكارالاس 8 وكرۋگى مەن 25 ۋەزدىڭ «كوروناۆيرۋستىڭ تارالۋىنا قارسى تۇرۋ ءۇشىن جەدەل تۇردە اسكەري جاعداي رەجيمىنە كىرۋ» قاجەتتىلىگى ايتىلعان. دەنساۋلىق ساقتاۋ جانە گيگيەنا ماسەلەلەرى جونىندەگى جەرگىلىكتى كوميتەتتىڭ مالىمەتى بويىنشا 2020 -جىلعى قىركۇيەكتىڭ 13ىنەن 14ىنە دەيىنگى كەزەڭدە يۋننان پروۆينتسياسىندا كورشىلەس ميانمادان «اكەلىنگەن» كوروناۆيرۋستىڭ راستالعان ەكى جاعدايى انىقتالعان. ميانمامەن تىكەلەي شەكارادا ورنالاسقان جۋيلي قالاسىنىڭ (يۋننان پروۆينتسياسى) اكىمشىلىگى اتالعان ەلدىمەكەننىڭ بارلىق تۇرعىنىن COVID-19-دى انىقتايتىن تەستىلەۋدەن وتكىزۋ تۋرالى شەشىم قابىلدادى.
سونىمەن قاتار جۋيلي قالاسىنىڭ بارلىق تۇرعىنىنا ۇيدە وقشاۋلانۋعا جانە شۇعىل قاجەتتىلىكسىز ەلدىمەكەننەن شىقپاۋعا بۇيرىق بەرىلدى. 12 -قىركۇيەكتەن كەيىن جۋيلي قالاسىنان تىس جەرلەرگە شىققان تۇرعىندارعا وزدەرىنىڭ تۇرعان جەرلەرىن جەرگىلىكتى بيلىككە حابارلاۋعا جانە كوروناۆيرۋسقا مىندەتتى تەكسەرۋدەن وتۋگە كەڭەس بەرىلدى. جۋيليدە 200 مىڭنان استام ادام تۇرادى. قالا يۋننان پروۆينتسياسىنىڭ دەحۋن- داي- تسزينپوس اۆتونوميالىق وكرۋگىندە، ميانما شەكاراسىندا ورنالاسقان. جەكسەنبى كۇنگى جاعداي بويىنشا يۋننان پروۆينتسياسىندا COVID-19 دياگنوزى راستالعان جەتى پاتسيەنت قابىلداۋدا. ولار شەتەلدەن كەلگەن.