كوروناۆيرۋستى انىقتايتىن قازاقستاندىق تەست قاشان تىركەلەدى

نۇر-سۇلتان. قازاقپارات - كوروناۆيرۋستى انىقتايتىن قازاقستاندىق تەست ءالى تىركەلگەن جوق.

بۇل تۋرالى ق ر د س م تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ ءتوراعاسى تيمۋر سۇلتانعازيەۆ ايتتى.

«قازىرگى ۋاقىتتا پ ت ر- زەرتحانالىق تەستىلەۋ سانى ارتىپ كەلە جاتىر. كوكتەمدە تاۋلىگىنە 25 مىڭ تەستىلەۋ جۇرگىزىلسە، تامىز ايىنىڭ سوڭىندا ونىڭ سانى 40 مىڭعا دەيىن جەتتى. قىركۇيەكتە قوسىمشا 20 پ ت ر اپپاراتى ساتىپ الىندى. ال ۆەتەرينارلىق زەرتحانالار ەلىمىزدىڭ اۋداندارىندا اشىلدى. ەندى قازان ايىندا كۇنىنە 60 مىڭعا دەيىن پ ت ر- تەستىلەۋ وتكىزەتىن بولامىز. سول ارقىلى حالىقتى بارىنشا پ ت ر تەستىلەۋدەن وتكىزەمىز. دايىندىق جۇرگىزىلىپ جاتىر»، - دەدى كوميتەت ءتوراعاسى ەلورداداعى №6-قالالىق ەمحانادا ب ا ق وكىلدەرىنىڭ ساۋالىنا وراي.

ونىڭ ايتۋىنشا، شىلدە ايىندا ۇكىمەت رەزەرۆىنەن قوسىمشا قاراجات ءبولىنىپ، 1,2 ميلليون تەست ساتىپ الىنعان.

«دەنساۋلىق ساقتاۋ مينيسترلىگىنىڭ ءتيىستى زەرتحانالارى بار. سولار ارقىلى ساتىلىپ الىنىپ جاتىر. بۇعان قوسا، ءاربىر دەنساۋلىق ساقتاۋ مەكەمەسىندە الەۋمەتتىك مەديتسينالىق ساقتاندىرۋ قورى ارقىلى تەستتەر ساتىپ الىنىپ، سىرقاتتانعان ادامداردى تەكسەرۋ جۇرگىزىلۋدە. نەگىزىنەن شەتەلدىك تەست جۇيەسىن ساتىپ الۋدامىز. قازاقستاندىق تەست جۇيەسى ءالى تىركەۋدەن وتكەن جوق. ءتيىستى تىركەۋ پروتسەدۋراسىنان وتكەننەن كەيىن ولاردى ساتىپ الۋىمىز مۇمكىن»، - دەدى تيمۋر سۇلتانعازيەۆ.

اۆتور: مارلان جيەمباي