ەۋروپادا كوروناۆيرۋس جۇقتىرعاندار سانى ارتتى

فرانسيا Covid-19 جۇقتىرعان جاڭا جاعدايلاردىڭ رەكوردتى ءوسىمى تۋرالى ءمالىم ەتتى، دەپ حابارلايدى قازاقپارات بي-بي-سي اگەنتتىگىنە سىلتەمە جاساپ.

دجونس حوپكينس ۋنيۆەرسيتەتىنىڭ مالىمەتىنشە، الەمدە 28,7 ميلليون ادام Covid-19 جۇقتىرعان، 920,8 مىڭ ناۋقاس قاۋىپتى ىندەتتەن كوز جۇمعان، 19,4 ميلليون ادام ساۋىعىپ كەتكەن. سەنبى كۇنى فرانسۋز بيلىگى ءبىر تاۋلىكتە 10561 ادامنىڭ ۆيرۋس جۇقتىرعانىن حابارلادى.

بۇل ءبىر كۇن بۇرىنعى كورسەتكىشتەن 1000 ادامعا كوپ. سونداي-اق Covid-19 دياگنوزى بار اۋرۋحاناعا، جانساقتاۋ بولىمىنە تۇسكەن ناۋقاستار سانى دا كوبەيگەن. وسىعان بايلانىستى بەدەلدى دارىگەرلەر توبى فرانسيا حالقىن جەكە كەزدەسۋلەردەن اۋلاق بولۋعا شاقىردى.

ماۋسىم ايىنان بەرى فرانسيادا اۋرۋ جۇقتىرۋ دەڭگەيى بارلىق جاستاعى ادامدار اراسىندا ءوستى، ءبىراق بيلىك بۇل ءوسىم اسىرەسە جاستار اراسىندا كوپ بايقالعانىن ەسكەرتتى.

فرانسيا ىندەتكە شالدىعۋشىلار ءوسىمى بايقالعان جالعىز ەۋروپالىق ەل ەمەس. قۇرلىقتاعى بيلىك ناۋرىز ايىندا ەنگىزىلگەن قاتاڭ كارانتيندىك شارالاردى جەڭىلدەتە باستاعاندا، اۋرۋ جۇقتىرعانداردىڭ سانى بىرتىندەپ ءوستى، ال تامىز ايىندا ايتارلىقتاي ارتتى.

سەنبى كۇنى فرانسيا اۋرۋحاناسىنا كوروناۆيرۋس دياگنوزى قويىلعان 2432 پاتسيەنت ءتۇستى.

ولاردىڭ 417 ءسى جانساقتاۋ بولىمىنە ورنالاستىرىلدى. 17 ادام كوز جۇمدى. جالپى العاندا ەلدە پاندەميا كەزىندە قايتىس بولعاندار سانى 30 مىڭنان استى. فرانسيا قايتىس بولعاندار سانى بويىنشا الەمدە جەتىنشى ورىندا.