قاراعاندى وبلىسىندا جاڭا قۇس فابريكاسى ىسكە قوسىلدى

10 مىڭ تاۋىققا ارنالعان كەشەن جىلىنا 100 توننا ەت جانە 350-400 مىڭ جۇمىرتقا وندىرەتىنى جوسپارلانعان، دەپ حابارلايدى قازاقپارات ءتىلشىسى.

جوبانى جۇزەگە اسىرۋعا كاسىپكەرلەر 20 ميلليون تەڭگە قارجى سالدى. دايىندىق جۇمىستارى بارىسىندا اۋدانى 1300 شارشى مەتر بوس عيمارات قالپىنا كەلتىرىلدى. قۋاتتىلىعى ءارتۇرلى وتاندىق جانە شەتەلدىك ءوندىرىستىڭ 36 ينكۋباتسيالىق جابدىعى، بالاپانداردى وسىرۋگە ارنالعان 80 برۋدەر، قۇستاردى ۇستاۋعا ارنالعان 50 دەن استام تور جانە ونىمدىلىگى ساعاتىنا 150 باس مودۋلدىك قۇس فابريكاسى ساتىپ الىندى. قازىرگى ۋاقىتتا قۇس قوراسىندا كوبب-500 ەت تۇقىمدى 900 بالاپان بار. ولار 50-60 كۇن وسىرىلەدى. مۇندا سونداي- اق، مانجۋرلىك بودەنە وسىرىلەدى. ولاردىڭ سانى 2,5 مىڭعا جەتتى. سونىمەن قاتار، براما، امروكس، كۋچينسكايا جانە حايسەكس سياقتى تاۋىقتاردىڭ تۇقىمدارى بار. كوبب-500 ءدى قوسپاعاندا، بارلىق تاۋىق تۇرلەرى جۇمىرتقا ءوندىرۋ جانە ءوسىرۋ ءۇشىن باپتالادى.

جوبا اياسىندا جاڭا جۇمىس ورىندارى قۇرىلدى. قۇس شارۋاشىلىعى كەشەنى تولىعىمەن اۆتوماتتاندىرىلعانىنا قاراماستان، وندىرىسكە جەرگىلىكتى سەگىز تۇرعىن تارتىلعان. تاعى ءۇش بوس جۇمىس ورنى بار. ايتا كەتۋ كەرەك، بۇل شارۋاشىلىق ەلورداداعى ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىمەن ىنتىماقتاسادى. ج و و تاۋىقتاردى كۇتۋ، تۇقىمدار، جەم جانە ۆەتەريناريا سالاسىنداعى سەلەكتسيا بويىنشا كونسۋلتاتيۆتىك جانە تۇسىندىرمە كومەك كورسەتەدى. جوبا ەكولوگيالىق تازا ءونىم الۋعا باعىتتالعاندىقتان، بارلىق تالاپتار ورىندالۋدا. بولاشاقتا ءونىمدى نۇرا اۋدانى، قاراعاندى جانە نۇر- سۇلتان بازارلارىنا شىعارۋ جوسپارلانۋدا.