بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«كەشە قاشىقتان وقىتۋعا قارجى بولۋگە قاتىستى كوتەرىلگەن ماسەلەلەرگە وراي بىرنەشە ءسوز ايتقىم كەلەدى. بۇگىندە ب ا ق- تا كوپتەگەن ءتۇرلى اقپاراتتار تاراپ جاتىر. بىرەۋلەر قاشىقتان وقىتۋعا 70 ميلليون دوللار ءبولىندى دەگەندى ايتىپ ءجۇر»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، وتكەن وقۋ جىلىنىڭ 4-توقسانىندا قاشىقتان وقۋعا كوشىرۋ ءماجبۇرلى شارا بولعان.
«بۇل اقپارات شىندىققا ساي ەمەس. ويتكەنى، قاشىقتان وقىتۋ وسى جىلدىڭ ءساۋىر ايىندا عانا ەنگىزىلە باستادى. 4-توقساندا قاشىقتان وقىتۋدى جۇزەگە اسىرۋ جايىندا ايتار بولساق، وعان قاراجات بولىنگەن جوق. سەبەبى، سول ۋاقىتتا، 4-توقساندا ءبىزدىڭ ينتەرنەت- پلاتفورمالار بارلىق رەسۋرستارىن اشىپ قويدى. توتەنشە جاعداي رەجيمى كەزەڭى بولعاندىقتان بۇل تولىقتاي تەگىن جاسالدى. ءبىز ارىپتەستەرىمىزگە ءوتىنىش جاسادىق، ولار قولداۋ كورسەتتى. بۇعان قوسا، 4-توقساندا تەلەۆيزيالىق ساباقتار دا تەگىن ءتۇسىرىلىپ، كورسەتىلدى»، - دەدى اسحات ايماعامبەتوۆ.