بۇل تۋرالى قازاقپارات ءتىلشىسى Finprom-عا سىلتەمە جاساپ حابارلايدى.
2020 -جىلدىڭ شىلدە ايىندا جايلى جابدىقتالعان ءۇيدى جالعا الۋدىڭ ورتاشا باعاسى ءبىر شارشى مەتر ءۇشىن 1,6 مىڭ تەڭگەنى قۇرادى، بۇل وتكەن جىلمەن سالىستىرعاندا 9,5 پايىزعا كوپ. ماۋسىم ايىمەن سالىستىرعاندا، تۇرۋعا جايلى باسپانانى جالعا الۋ قۇنى 0,4 پايىزعا ءوستى. جوندەلمەگەن تۇرعىن ۇيلەردى جالعا الۋدىڭ ورتاشا باعاسى ءبىر شارشى مەتر ءۇشىن 832 تەڭگەنى قۇراعان - بۇل وتكەن جىلمەن سالىستىرعاندا 4 پايىز قىمبات.
اعىمداعى جىلدىڭ ماۋسىم ايىمەن سالىستىرعاندا، جالعا الۋ باعاسى وزگەرىسسىز قالدى. ەلىمىزدىڭ ءىرى قالالارى مەن مەگاپوليستەرى اراسىندا جايلى جابدىقتالعان تۇرعىن ءۇيدى جالعا الۋدىڭ ەڭ جوعارى باعالارى ەلوردادا تىركەلگەن - ءبىر شارشى مەتر ءۇشىن 3,1 مىڭ تەڭگە، بۇل بىلتىرعى جىلمەن سالىستىرعاندا 10,3 پايىزعا كوپ. باعالارى جوعارى ءىرى قالالار «ۇشتىگىنە» سونداي-اق الماتى جانە اقتاۋ قالالارى كىردى. سونىمەن قاتار، جايلى جابدىقتالعان تۇرعىن ءۇيدى جالعا الۋ باعالارىنىڭ ايتارلىقتاي قىمباتتاۋى پاۆلوداردا (جىلىنا بىردەن 37,9 پايىزعا، 1,7 مىڭ تەڭگەگە دەيىن)، تالدىقورعاندا (36,9 پايىزعا، 1,7 مىڭ تەڭگەگە دەيىن) جانە تارازدا (15,4 پايىزعا، 1,2 مىڭ تەڭگەگە دەيىن) بايقالىپ وتىر.
ال ەڭ تومەن باعالار سەمەي قالاسىندا بەلگىلەندى. مۇندا جايلى جابدىقتالعان ءۇيدى جالعا الۋ باعاسى ءبىر شارشى مەتر ءۇشىن 1,2 مىڭ تەڭگەنى قۇراپ وتىر، بۇل وتكەن جىلمەن سالىستىرعاندا 3,3 پايىزعا كوپ. جوندەلمەگەن تۇرعىن ۇيلەردى جالعا الۋدىڭ ەڭ جوعارى باعالارى ەلوردادا بايقالىپ وتىر - ءبىر شارشى مەتر ءۇشىن 1,6 مىڭ تەڭگە.
بۇل وتكەن جىلمەن سالىستىرعاندا 3,6 پايىزعا كوپ. مۇنداي ۇيلەردى جالعا الۋدىڭ ەڭ تومەن باعاسى سەمەي قالاسىندا تىركەلدى - ءبىر شارشى مەتر ءۇشىن 594 تەڭگە، بىلتىرعى جىلمەن سالىستىرعاندا 2,6 پايىزعا قىمبات.
اۆتور: زارينا تۋعانبايەۆا