بىرنەشە مەملەكەت قازاقستانعا اۋە رەيستەرىن قايتا اشۋدى ۇسىندى

بۇل تۋرالى قازاقپارات ءتىلشىسىنىڭ رەسمي ساۋالىنا بەرىلگەن يندۋستريا جانە ينفراقۇرىلىمدىق دامۋ مينيسترلىگىنىڭ جاۋابىندا ايتىلعان.

«قازىرگى تاڭدا مالايزيا، پولشا، ماجارستان، قىرعىزستان، چەحيا، ازەربايجان جانە تاعى باسقا مەملەكەتتەردەن قازاقستانمەن اۋە قاتىناسىن جانداندىرۋ بويىنشا ۇسىنىستار ءتۇسىپ وتىر»، - دەلىنگەن جاۋاپتا.

سونداي-اق قازاقستان دا باسقا مەملەكەتتەرگە اۋە قاتىناسىن ءوزارا رەتكە كەلتىرۋدى ۇسىنعان.

ناقتىراق ايتقاندا ق ر يندۋستريا جانە ينفراقۇرىلىمدىق دامۋ مينيسترلىگى قازاقستاندىق اۋە كومپانيالاردىڭ ءوتىنىشى بويىنشا وزبەكستان، قىرعىزستان، تاجىكستان مەملەكەتتەرىمەن رەيستەردى قالپىنا كەلتىرۋ ماسەلەسى كوتەرگەن.

وسىلايشا كوميسسيانىڭ 2020-جىلعى 3- قىركۇيەكتەگى وتىرىسىنىڭ حاتتاماسىنا سايكەس 10- قىركۇيەكتەن باستاپ وزبەكستان (1 رەيس)، قىرعىزستان (2 رەيس) مەملەكەتتەرىنە سانيتارلىق تالاپتاردىڭ ساقتالۋىمەن رەيستەردى قالپىنا كەلتىرۋ جانە تاجىكستانعا اۋە ساپارلارىن جانداندىرۋ ماسەلەسىن پىسىقتاۋ تاپسىرىلعان.

«سونداي-اق، قازاقستاندىق اۋە كومپانيالاردىڭ رەسەيگە رەيستەردى ورىنداۋ بويىنشا نيەتتەرى بار. وسىعان بايلانىستى، 2020 جىلعى 12- تامىزدا مينيسترلىكپەن ر ف كولىك ءمينيسترىنىڭ ءبىرىنشى ورىنباسارى ا. ۆ. نەرادكونىڭ اتىنا ەكى مەملەكەت اراسىنداعى رەيستەردى قالپىنا كەلتىرۋ جانە قازاقستاندىق اۆياتاسىمالداۋشىلارعا رۇقساتتار بەرۋ دايىندىعىن راستاۋ تۋرالى حات جولدادى. الايدا بۇگىنگى كۇنگە دەيىن رەسەي تاراپىنان جاۋاپ كەلىپ تۇسكەن جوق»، - دەدى مينيسترلىكتەن.