نۇر-سۇلتان قالالىق پوليتسيا دەپارتامەنتىنىڭ مالىمەتىنشە، كەشكىسىن قۇرىلىس نىسانىن كۇزەتۋ كەزەكشىلىگىنە تۇسكەن 33 جاستاعى ەلوردا تۇرعىنى تاڭعى ساعات 05.30 شاماسىندا كوشەدەن بوگدە دىبىستى ەستيدى. ەسىكتى اشا بەرگەن ساتىندە بەلگىسىز بىرەۋلەر سوققى جاساپ، ودان كەيىن باسىنا سەمەنتتەن بوساعان قاپ كيگىزگەن. قاراقشىلار كۇزەتشىنى بولمەگە سۇيرەپ اكەلىپ، قولى مەن اياعىن بايلاپ تاستايدى. قارسىلىق تانىتپاق بولعان وعان قىلمىسكەرلەر پىشاق سۇعىپ، ەسىنەن تانعانشا تەمىرمەن ۇرعان. ەس-ءتۇسسىز جاتقان ادامدى تاڭەرتەڭ جۇمىسقا كەلگەن قۇرىلىسشىلار تاۋىپ الادى.
«قۇرىلىس الاڭىنان جالپى قۇنى 2 ميلليون تەڭگە بولاتىن تاۋارلىق- ماتەريالدىق قۇندىلىقتار مەن كۇزەتشىنىڭ جەكە زاتتارى ۇرلانعانى انىقتالدى. ۇرلانعان زاتتاردى ەش كەدەرگىسىز الىپ كەتۋگە قۇرىلىس الاڭىندا قاۋىپسىزدىك جۇيەسىنىڭ جوقتىعى جول بەرگەن. پوليتسيا قىزمەتكەرلەرى جەدەل- ىزدەستىرۋ شارالارىنىڭ بارىسىندا قاراقشىلىق شابۋىل جاساعان كۇدىكتىلەر انىقتالىپ، ۇستالدى. ولار بۇعان دەيىن بىرنەشە رەت سوتتالعان 42 جانە 34 جاستاعى اعايىندىلار بولىپ شىقتى. اعايىندىلار قۇرىلىس الاڭىنان ۇرلانعان تاۋارلىق- ماتەريالدىق قۇندىلىقتاردى قوسشى اۋىلىنا جەتكىزىپ ۇلگەرگەن. ولار ماتەريالداردى سول جەردە ساتۋدى جوسپارلاعان. كۇدىكتىلەردى پوليتسيا قىزمەتكەرلەرى قىلمىس جاسالعاننان كەيىن بىرنەشە ساعاتتىڭ ىشىندە ۇستادى. زاتتاي ايعاقتار تاركىلەندى. كۇدىكتىلەر ۋاقىتشا وقشاۋلاعىشقا قامالدى. اتالعان فاكتى بويىنشا ق ر ق ك 192-بابىمەن قىلمىستىق ءىس قوزعالدى. تەرگەۋ جۇرگىزىلىپ جاتىر»، - دەدى ۆەدومستۆودان.
اۆتور: مارلان جيەمباي