«پرەزيدەنت قازاقستان حالقىنا جولداۋىندا قورشاعان ورتانى قورعاۋ مەن ەكولوگيا ماسەلەسى ەلدەگى كۇن ءتارتىبىنىڭ باسىنا شىعاتىنىن ايتىپ ءوتتى. ماڭىزدى مىندەتتىڭ ءبىرى - ەل ىشىندە ەكولوگيالىق تۋريزم مادەنيەتىن بەلسەندى تۇردە دامىتۋ. بۇل رەتتە ەلوردادا ەكوباقتاردى سالۋ ەكوتۋريزمدى دامىتۋعا سەرپىن بەرەدى. جالپى ەكولوگياىق امال - باقتىڭ ۆيزيتتىك كارتاسىنا، ال بۇل امال كەلۋشىلەردىڭ ەكولوگيالىق تانىم- تۇسىنىگىن جاقسارتۋدىڭ نەگىزىنە اينالاتىنىن اتاپ ءوتۋ كەرەك»، - دەدى نۇرلان ۇرانحايەۆ.
سونىمەن قاتار مايبالىق كولىنىڭ شىعىس جاعىنا قاراي ەكولوگيالىق باقتى سالۋ وسىناۋ مەكەننىڭ تابيعي اماندىعىن ساقتاپ قانا قويماي، تۋريستىك جانە ەكونوميكالىق الەۋەتىن دە اشاتىنىن جەتكىزدى. باسقارما باسشىسىنىڭ ايتۋىنشا ەكولوگيالىق باقتا بالىق اۋلاۋعا ارنالعان جاساندى سۋ قويماسى پايدا بولادى. ودان بولەك ەرەكشە قورعالاتىن اۋماق، جاياۋ جانە ۆەلوسەرۋەنگە ارنالعان جولدار، سپورتپەن اينالىسۋعا بولاتىن، بىرەگەي ەكوجۇيەنى قولداۋعا ارنالعان اۋماقتار قۇرىلادى.
«ەكوباق مەكتەپكە دەيىنگى بالالار، وقۋشىلار مەن ستۋدەنتتەر ءۇشىن عىلىمي- تانىمدىق الاڭعا اينالۋى مۇمكىن. ول جەردە عىلىمي جانە تابيعي جوبالاردى جۇزەگە اسىرۋعا مۇمكىندىك بولادى»، - دەيدى ول.
قازىرگى ۋاقىتتا قالا شەتىندە تۇرعىندار ءۇشىن ىڭعايلى بولاتىنداي تابيعي باق جوقتىڭ قاسى. سول سەبەپتى وسى ەكوباقتىڭ قۇرىلىسىنا ەرەكشە نازار اۋدارىلعالى وتىر. مايبالىق كولىندەگى ەكىنشى ەكوباقتىڭ جالپى اۋماعى 400 گەكتاردى، ال سۋ قويماسى 120 گەكتاردى الادى.