«27 - تامىزدا وتستاۆكاعا ءوتىنىش جازدىم»، - دەپ ءوزى راستادى اقپاراتتى شاھار باسشىسى. ەندى تەكەلى قالاسى اكىمىنىڭ الداعى تاعدىرى قالاي بولاتىنىن الماتى وبلىسىنىڭ اكىمى شەشەدى. اماندىق باتالوۆ ءبىر ايدىڭ ىشىندە پرەزيدەنت اكىمشىلىگىنىڭ كەلىسىمىمەن وتستاۆكانى قابىلدايدى نەمەسە قابىلدامايدى.
ايتا كەتەيىك، بۇعان دەيىن تەكەلى قالاسىنىڭ تۇرعىندارى الەۋمەتتىك جەلىگە شىعىپ، اكىمدەرىن جۇمىستان شىعارماۋدى ءوتىنىپ سۇراعان بولاتىن. حالىقتىڭ سوزىنشە، ب. ونەربايەۆ تەكەلىگە اكىم بولىپ كەلگەلى قۇرىلىس جاندانىپ، باسپاناسىزدار ءۇيلى بولىپ، كوشەلەر جوندەلىپ، كوپ جۇمىس اتقارىلا باستاعان.
ەستەرىڭىزگە سالا كەتەيىك، تەكەلى قالاسى اكىمىنىڭ اپپارات باسشىسى 1,5 ميلليون تەڭگە پارامەن ۇستالىپ، قىلمىسى دالەلدەنگەن بولاتىن. 1978 - جىلعى شەنەۋنىك ەندى العان پاراسىن ون ەسە قىلىپ مەملەكەتكە قايتارىپ، ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى. سوت وعان 15 ميلليون تەڭگە ايىپپۇل سالدى. العاشقى ەڭبەك جولىن قاراپايىم كۇزەتشى بولىپ باستاعان تەكەلى قالاسى اكىمىنىڭ اپپارات باسشىسى پارامەن ۇستالعاندا اعىنى كۇشتى سۋعا سەكىرىپ، ءوز ومىرىنە قاۋىپ ءتوندىرىپ قاشقان بولاتىن. زاڭ بويىنشا قولاستىنداعى مەملەكەتتىك قىزمەتكەر پارامەن ۇستالسا، ونىڭ باسشىسى قىزمەتىنەن كەتۋى ءتيىس. ەندى ب. ونەربايەۆ ورنىندا قالا ما، جوق پا - بەلگىسىز.
اۆتور: سامال قابىشيەۆا