«وسى ورايدا «ەكو» باعدارلاماسىمەن كۆوتانى 7 مىڭعا دەيىن، ياعني، 7 ەسە كوبەيتۋ مىندەتىن قويدى. ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ مەملەكەت باسشىسى قازاقستان حالقىنا جولداۋىندا دەنساۋلىق ساقتاۋ مينيسترلىگىنىڭ الدىنا 11 تاپسىرما جۇكتەگەنىن ەسكە سالدى. ولار بۇعان دەيىن تىڭعىلىقتى تالقىلاندى. تەك ەكو- عا كۆوتانى ارتتىرۋعا عانا توقتالعىم كەلەدى. پرەزيدەنت ۇكىمەتكە كەلەسى جىلدان باستاپ «اڭساعان ءسابي» باعدارلاماسىن ىسكە قوسۋدى جانە ەكو باعدارلاماسى بويىنشا كۆوتا سانىن 7 مىڭعا دەيىن ارتتىرۋدى تاپسىردى»، - دەدى ول.
ونىڭ دەرەگىنشە، ەكو باعدارلاماسى ەلىمىزدە 2010 -جىلدان باستاپ مەديتسينالىق كومەكتىڭ كەپىلدەندىرىلگەن كولەمىنە قوسىلعان. بۇگىندە ەلىمىزدە 26 ەكو ورتالىق جۇمىس ىستەيدى. ونىڭ 21- ءى جەكەمەنشىك سانالادى. قازىرگى ۋاقىتتا وسى ادىسپەن 22 مىڭنان استام بالا دۇنيەگە كەلدى.
«رەسپۋبليكالىق ەلەكتروندىق دەنساۋلىق ساقتاۋ ورتالىعىنىڭ مالىمەتىن بويىنشا ەلىمىزدە 9 مىڭ 467 ايەل بەدەۋلىك دياگنوزىمەن ەسەپتە تۇر. كەلەسى جىلى ىسكە قوسىلاتىن «اڭساعان ءسابي» باعدارلاماسىنا جاساندى جولمەن ۇرىقتاندىرۋ ارقىلى بالا سۇيۋگە ءۇمىتتى كەز كەلگەن جۇپتار قاتىسا الادى»، - دەدى رەسمي وكىل.
وسى باعدارلاما اياسىندا پاتسيەنت جىلىنا ءبىر رەت ەكو جاساي الادى. «الەۋمەتتىك مەديتسينالىق ساقتاندىرۋ قورى بيىل 1105 ەكو- عا 943 ميلليون 800 مىڭ تەڭگە قاراستىرعان. پرەزيدەنتتىڭ جولداۋىنا سايكەس، ەكو كۆوتانى 7 مىڭعا جەتكىزۋ كەرەك، ياعني 7 ەسە كوبەيتۋ قاجەت. 943 ميلليون- دى 7 ەسەگە كوبەيتسەك، ءتيىستى سوما شىعادى»، - دەپ ناقتىلادى ب. قوجاحمەتوۆ.
مامان نە دەيدى؟
«ەكومەد» ادام ۇرپاعىن ءوربىتۋ ەمحاناسىنىڭ باسشىسى سالتانات بايقوشقاروۆانىڭ پايىمىنشا، قازاقستاندا بەدەۋلىگى بار ادامداردىڭ ءتىزىلىمىن جاساۋ قاجەت.
«بەدەۋلىك ماسەلەسىمەن اينالىسقانىما 32 جىل بولىپتى. ونىڭ ىشىندە ەكستراكورپورالدى ۇرىقتاندىرۋ ءادىسىنىڭ العاشقى مامانى رەتىندە ەنگىزگەنىمە 25 جىل تولىپتى. ءبىز كوبىنە اقىلى تۇردە قىزمەت كورسەتتىك. 2010 -جىلدان باستاپ مەملەكەتىمىز 100 كۆوتادان باستاسا، بيىل 1 مىڭنان ءسال اساتىن كۆوتاعا قول جەتكىزدىك. سوعان دا قۋاناتىنبىز. ءبىراق، كەشەگى پرەزيدەنت جولداۋىنداعى 7 مىڭ كۆوتا ءبولۋ شەشىمى ءبىز ءۇشىن ۇلكەن قۋانىش بولدى. ويتكەنى، بىزگە كەلەتىن ادامداردىڭ بارلىعى بىردەي 1 ميلليون تەڭگە تابا المايدى. بۇل اقشانىڭ جارتىسى دارىگە كەتەدى. سوندىقتان بۇل ۇلكەن كومەك جانە پاتسيەنتتەرىمىزدىڭ بارلىعى قۋانىپ جاتىر. كۇتپەگەن جاعداي بولدى. ءبىز كوپ بولسا 2 ەسە كوبەيتەر دەپ ويلاعان ەدىك»، - دەدى ول پرەزيدەنت جولداۋى اياسىنداعى الەۋمەتتىك باسىمدىقتاردى تالقىلاۋعا ارنالعا شارادا.
وسى ورايدا ول پرەزيدەنت جولداۋىنان كەيىن مينيسترلىكپەن قىزۋ جۇمىس ىستەيتىندەرىن جەتكىزدى. ەڭ باستى ماسەلە - ەلىمىزدە بەدەۋلىكتىڭ ءتىزىلىمى جوق. «ءبىز جالپى سوزبەن «5، 6- وتباسى بەدەۋلىكپەن بەتپە- بەت كەلەدى» دەپ ايتامىز. الايدا، ولاردىڭ بارلىعىنا ارقاۋ بولاتىن ستاتيستيكا جوق. سوندىقتان سيفرلاندىرۋ زامانىندا قانشا ادام بەدەۋلىككە ۇشىراعاندىعىن انىقتاۋ قاجەت. ياعني، بەدەۋ ادامداردى تىركەۋ ماسەلەسىن دۇرىستاپ، بازا، ءتىزىلىم جاساۋىمىز كەرەك. دەنساۋلىق ساقتاۋ مينيسترلىگىنىڭ بۇيرىقتارىن، حاتتامالارىن وزگەرتۋگە ءتيىسپىز»، - دەدى سالتانات بايقوشقاروۆا.
اۆتور: رۋسلان عابباسوۆ