بۇل تۋرالى ق ر مەملەكەتتىك حاتشىسى قىرىمبەك كوشەربايەۆ الماتىدا وتكەن جيىندا ايتتى، دەپ حابارلايدى قازاقپارات ءتىلشىسى.
«الداعى ۋاقىتتا ساراپشىلاردىڭ پىكىرىنشە، حالقىمىزدىڭ سانى 19 ميلليونعا ال، مەملەكەت قۇراۋشى ۇلت - قازاقتاردىڭ ۇلەسى كەمىندە 78 پايىزعا جەتەدى دەپ كۇتىلۋدە. بۇيىرتسا، اينالاسى وتىز جىلدىڭ ىشىندە قازاقتاردىڭ ەل حالقىنداعى ۇلەس سالماعى 1991 -جىلعى 39 پايىزدان ەكى ەسە ارتقالى وتىر. ەندىگى كەزەكتە ۇلتارالىق كەلىسىمدى ساقتاي وتىرا ءتىل جانە باسقا دا ۇلتتىق ماسەلەلەردى قوعامدا ايقىنىراق ايتۋعا نەگىز بار دەپ ەسەپتەيمىز»، - دەدى مەمحاتشى.
قىرىمبەك كوشەربايەۆ «تەكسىزدىك - تىلسىزدىكتەن باستالادى» دەگەن ءسوزدى تىلگە تيەك ەتتى.
«بۇل باعىتتا ەلباسىنىڭ باستاماسىمەن لاتىن الىپبيىنە كوشۋ - مەملەكەتتىك ءتىلدىڭ دامۋىنا جاسالعان جاڭا بەتبۇرىس. جاڭا ءالىپبي قوعامنىڭ بارلىق سالاسىنا ەنۋى كەرەك. جاڭا ءالىپبي قازاق ءتىلىنىڭ 21-عاسىرداعى اقپاراتتىق تەحنولوگيالار تىلىنە اينالۋىنا جول اشادى. ياعني، قازاق ءتىلىنىڭ جاڭا ءداۋىرى باستالادى! بۇل دا ۇلتىمىزدىڭ جاڭا بولمىسىن قالىپتاستىرۋداعى نەگىزگى فاكتورعا اينالماق»، - دەدى ول.
اۆتور: گۇلميرا عوسمانالي