ونىڭ ايتۋىنشا، بۇگىنگىدەي كۇردەلى كەزەڭدە حالىق بولىپ كەڭەسىپ، جۇرت بولىپ ءباتۋالاساتىن كەلەلى ماسەلەلەر از ەمەس.
«ءبىزدىڭ قوعامىمىز جاڭارعان سوڭ ۇستاناتىن سالت- داستۇرلەرىمىز دە وزگەرۋگە ءتيىس. ەلدى كەرى تارتاتىن جاعىمسىز قاسيەتتەردەن تەزدەتىپ ارىلۋىمىز كەرەك. مىسالى، قازاقتىڭ تويى ەسەپسىز شىعىننىڭ ەمەس، شىنايى شاتتىقتىڭ كورىنىسىنە اينالۋعا ءتيىس. بارىمىزدى شاشىپ- توگىپ، قارىزدانىپ توي مەن باسقا جيىن وتكىزەتىن ادەتتەن ارىلۋىمىز قاجەت. ىسىراپشىلدىق پەن داڭعازالىق قوعامنىڭ دا، ادامنىڭ دا ابىرويىن توگەدى. سوندىقتان كەيبىر ماسەلەلەردى زاڭدى جولمەن رەتتەۋدىڭ كەزى كەلدى دەپ ويلايمىن. ال جاۋاپسىزدىق پەن نەمقۇرايدىلىق بۇكىل ەلدى قاسىرەتكە ۇشىراتادى»، - دەدى ول.
ونىڭ ايتۋىنشا، بەكىتىلگەن سانيتارلىق تالاپتاردى بۇزىپ، جاسىرىن توي جاساپ، قۇدالىق وتكىزىپ، اس بەرىپ جاتقان وقيعالاردىڭ ارتى ورنى تولماس وكىنىشكە اكەپ سوقتىرۋدا.
«كورشى ەلدەردە تۋعاننان ولگەنگە دەيىنگى ورىندالاتىن سالت- ءداستۇر، (توي، اس، جانازا ت. ب) ادەت- عۇرىپ راسىمدەرىن زاڭمەن رەتتەپ قويعاندىقتان حالىق قويىلعان تالاپتى قالىپتى تۇردە قابىلدايدى. ءبىز نە ىستەۋىمىز كەرەك؟ الداعى ۋاقىتتا كوپشىلىكپەن كەڭەسە كەلە، ءبىز دە كورشى ەلدەردىڭ ۇلگىسى بويىنشا عۇرىپتىق راسىمدەردى زاڭمەن رەتتەۋ شارالارىن قولعا الاتىن ۋاقىت جەتتى دەپ ويلايمىز. سوندىقتان، دۇنيەجۇزىلىك پاندەميا تۇسىندا جانە ودان كەيىنگى كەزەڭدە عۇرىپتىق راسىمدەردى زاڭمەن رەتتەۋ شارالارى بويىنشا زيالى قاۋىم مەن قوعام قايراتكەرلەرى، وسى سالامەن اينالىساتىن زاڭگەرلەردەن قۇرالعان جۇمىس توبىن قۇرۋدى ۇسىنامىز»، - دەدى مەملەكەتتىك حاتشى. بۇل توپ كورشى ەلدەردىڭ تاجىريبەسىن زەرتتەپ، حالىقتىڭ وي-پىكىرىن زەردەلەپ جانە قاجەت بولعان جاعدايدا ءتيىستى نورماتيۆتىك- قۇقىقتىق اكتىنىڭ جوباسىن ازىرلەۋمەن اينالىساتىن بولادى.