نۇر-سۇلتان قالاسىنىڭ حالىقارالىق اۋەجايىنا اكىمشىلىك قۇقىق بۇزۋشىلىق تۋرالى كودەكستىڭ 425-بابى 1-تارماعىنا سايكەس 1600 ا ە ك كولەمىندە ايىپۇل سالىنعان. دەگەنمەن، قىسقارتىلعان ءوندىرىس اياسىندا ەلوردانىڭ اۋە ايلاعى 2,2 ميلليون تەڭگە ايىپپۇل تولەدى.
«وعان ەلوردا اۋەجايىنىڭ كارانتين شەكتەۋ شارالارىن ساقتاماۋ سەبەپ بولدى. ۇشىپ كەلەتىن جانە كەتەتىن جولاۋشىلارعا جەكە ءدالىز ۇيىمداستىرىلماعان، رەيسكە تىركەۋ جانە وتىرعىزۋ بارىسىندا جولاۋشىلار اراسىندا الەۋمەتتىك اراقاشىقتىق ساقتالماعان، تەرمينالدا زالالسىزداندىرۋ كىلەمشەلەرى توسەلمەگەن، پەررون اۆتوبۋسىنىڭ جۇرگىزۋشىسى قولعاپ كيمەگەن جانە ماسكالارى دا تولىق ەمەس»، - دەپ تۇسىندىرەدى ءسادۋاقاس بايعابىلوۆ.
سونىمەن قاتار ونىڭ ايتۋىنشا، جوعارىدا اتالعان باپپەن «Scat» اۋەكومپانياسىنا ۇشاققا جولاۋشىلاردى وتىرعىزۋ بارىسىندا الەۋمەتتىك اراقاشىقتىقتى ساقتاماعانى جانە قىزمەتكەرلەردى اۋىسىم بارىسىندا مەديتسينالىق تەكسەرۋدەن وتكىزبەگەنى ءۇشىن اكىمشىلىك ءىس قوزعالدى.
«ەير استانا» اۋە كومپانياسى دا اۋە بيلەتتەرىن ساتۋ كەڭسەسىندە قورعانىس قورشاۋىن ورناتپاعانى جانە قىزمەتكەرلەردى اۋىسىم بارىسىندا مەديتسينالىق تەكسەرۋدەن وتكىزبەگەنى ءۇشىن جاۋاپقا تارتىلدى.
ايتا كەتەرلىگى، كوروناۆيرۋس ىندەتىنىڭ تارالىنا جول بەرمەۋ ماقساتىندا ەلوردا اۋەجايىنىڭ 3 تەرمينالىندا 15 ستاتسيونارلىق تەپلوۆيزور ورناتىلعان. تەپلوۆيزور كامەرالارى بەلگىلى ءبىر اراقاشىقتىقپەن ورناتىلعان. ولار ۇشىپ كەلگەن جانە ۇشىپ كەتەتىن جولاۋشىلارعا قولايسىزدىق تۋدىرماي ادامداردىڭ دەنە قىزۋىن ولشەي الادى.
«قىسقارتىلعان ءوندىرىس مەرزىمىنىڭ اياقتالۋىنا بايلانىستى الماتى قالاسىنىڭ حالىقارالىق اۋەجايىنا اكىمشىلىك قۇقىق بۇزۋشىلىق تۋرالى كودەكستىڭ 425-بابى 1-تارماعىنا سايكەس 1600 ا ە ك كولەمىندە ايىپۇل سالىندى»، - دەدى كولىكتەگى باس سانيتار.
اۆتور: مارلان جيەمباي