تۇركىستان وبلىسىنىڭ وڭىرلىك كوممۋنيكاتسيالار قىزمەتىنەن ءمالىم ەتكەندەي، ءوڭىر اكىمدىگىنىڭ مۇرىندىق بولۋىمەن وتكىزىلەتىن جارمەڭكەگە 447,2 توننا اۋىل شارۋاشىلىعى ونىمدەرى جونەلتىلدى. اتاپ ايتقاندا، ازىق- تۇلىك تيەلگەن 34 جۇك كولىگىندە 267,7 توننا كوكونىس، باقشا، كارتوپ، 29,5 توننا جەمىس- جيدەكتەر، 72 توننا ەت جانە ەت ونىمدەرى، 47,5 توننا ءسۇت ونىمدەرى، 10 توننا بالىق، 6 توننا اسەل، 14,5 توننا جەمىس شىرىنى مەن كونسەرۆى ونىمدەرى بار. بۇل تاۋارلار ەلوردالىقتارعا نارىقتاعىدان 15-20 پايىزعا تومەن باعادا ساتىلاتىن بولادى. ماسەلەن، نەگىزگى ونىمدەر رەتىندە سيىر ەتىنىڭ كەلىسى 1700-1800 تەڭگە، قاۋىن- قاربىز 75-100 تەڭگە، كوكونىس ونىمدەرىنىڭ باعاسى 100-150 تەڭگە بولىپ بەكىتىلگەن.
«بيىلعى جىلى اگروقۇرىلىمدارعا بارىنشا مەملەكەتتىك قولداۋ كورسەتىلدى. اتاپ ايتقاندا، نارىقتاعىمەن سالىستىرعاندا 20 تەڭگەگە ارزانداتىلعان باعامەن كوكتەمگى دالا جۇمىستارىن جۇرگىزۋگە 37,0 مىڭ توننا، كۇزگى دالا جۇمىستارىن جۇرگىزۋگە 39,2 مىڭ توننا جانارماي ءبولىندى. وبلىستىڭ تابيعي كليماتتىق ەرەكشەلىگىنە وراي، ەرتە پىسەتىن باقشا، كوكونىس، كارتوپ ونىمدەرىن جيناۋ قارقىندى تۇردە جۇرگىزىلۋدە. الدىن الا جاسالىنعان ەسەپ بويىنشا بيىل 2,8 ميلليون توننا كوكونىس، باقشا، كارتوپ ونىمدەرىن جيناۋ كۇتىلىپ وتىر. بۇگىنگى كۇنگە 2,4 ميلليون توننا جينالدى. ايتا كەتەيىك، وسى ازىق- تۇلىك تاۋارلارىنىڭ باعاسىن نەگىزسىز كوتەرمەۋ جانە شارۋالارعا قولداۋ كورسەتۋ ماقساتىندا مەملەكەت باسشىسىنىڭ تاپسىرماسىمەن «ەگىس الاڭىنان - دۇكەن سورەسىنە دەيىن» پيلوتتىق جوباسى باستالدى. جوبانى جۇزەگە اسىرۋ ءۇشىن ۇكىمەت رەزەرۆىنەن 1 ميلليارد تەڭگە قارجى ءبولىندى»، - دەلىنگەن اقپاراتتا. ەلوردادا اۋىلشارۋاشىلىق جارمەڭكەسى «حان- شاتىر» ساۋدا، ويىن- ساۋىق ورتالىعىنىڭ جانىندا وتەدى.