پورتال مالىمەتىنشە، 3- تامىزدا قاراعاندى قالالىق پوليتسيا باسقارماسىنىڭ وڭتۇستىك-شىعىس پوليتسيا بولىمىنە 40 جاستاعى ايەلدەن ارىز تۇسكەن.
ونىڭ ايتۋىنشا، كوشەدە كەلە جاتقاندا بەلگىسىز ادام كەلىپ ءوزىن پوليتسيا قىزمەتكەرى رەتىندە تانىستىرعان. بەلگىسىز ادام جابىرلەنۋشىنىڭ دۇكەنىنەن ۇرلانعان زاتتاردى ساتىپ الۋعا بولاتىنى تۋرالى بەلگى بەرگەن. شىنىندا دا بۇعان دەيىن بىرنەشە كۇن بۇرىن بەلگىسىز بىرەۋلەر جابىرلەنۋشىنىڭ دۇكەنىن توناپ، قوماقتى قارجىدا شىعىن كەلتىرگەن ەكەن.
«سوندىقتان دا ايەل ادام ەش كۇدىكتەنبەستەن بەلگىسىز ەر ادامعا 660 مىڭ تەڭگە اقشا بەرىپ، بىرەر ساعات وتكەن سوڭ ءوزىنىڭ الدانعانىن ءبىلىپ، پوليتسياعا ارىزدانعان. جابىرلەنۋشىنىڭ ءتۇسىندىرۋى بويىنشا، كۇدىكتى شامامەن 35-50 جاس ارالىعىندا بولۋى مۇمكىن دەپ بولجانعان.
27- تامىزدا پوليتسيا قىزمەتكەرلەرىنىڭ جۇرگىزگەن جەدەل ىزدەستىرۋ ءىس-شارالارى بارىسىندا الاياقتىق جاسادى دەگەن كۇدىكپەن 48 جاستاعى ەر ادام ۇستالىپ، كىناسىن مويىنداعان»، - دەلىنگەن حابارلامادا.
وسى دەرەك بويىنشا ق ر قىلمىستىق كودەكسىنىڭ 190-بابى (الاياقتىق) بويىنشا قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر.