سۋدا ادامداردىڭ قاۋىپسىزدىگىن قامتاماسىز ەتۋ ماقساتىندا ت ج ك پوليتسيامەن جانە جەرگىلىكتى اتقارۋشى ورگاندارىمەن بىرلەسىپ ۇيىمداستىرۋشىلىق، پراكتيكالىق ءىس- شارالار كەشەنىن جۇرگىزدى. كۇن سايىن ازاماتتىق قورعاۋ ورگاندارى مەن پوليتسيا قىزمەتكەرلەرىنىڭ قاتىسۋىمەن رەيدتەر مەن پاترۋلدەۋ جۇزەگە اسىرىلدى.
اعىمداعى جىلدىڭ باسىنان بەرى ەلىمىزدىڭ سۋ ايدىندارىندا قۇتقارۋشىلار 160 ادامدى، ونىڭ ىشىندە 35 بالانى اجالدان امان الىپ قالدى. ال، سۋعا شومىلۋ ماۋسىمى باستالعاننان بەرى (1 - ماۋسىمنان 31 - تامىز ارالىعىندا) 140 ادام، ونىڭ ىشىندە 27 بالا قۇتقارىلدى.
سونىمەن قاتار، سۋعا شومىلۋ كەزەڭىنىڭ باسىنان باستاپ (1-ماۋسىمنان 31- تامىز ارالىعىندا) سۋعا شومىلۋ كەزىندە الكوگولدىك ماس كۇيىندە، سۋعا باتۋشىنى قۇتقارۋ جانە بالالاردى ەرەسەكتەردىڭ قاراۋىنسىز قالدىرۋ كەزىندە 239 ادام (2019 -جىلى 282) ، ونىڭ ىشىندە 75 بالا (2019 -جىلى 88 بالا) سۋعا كەتىپ، كوز جۇمدى.
تەك سۋعا شومىلۋ ماۋسىمىنىڭ سوڭعى اپتاسىندا (24-31-تامىز ارالىعىندا) الماتى، اقتوبە، قوستاناي، اقمولا، جامبىل، پاۆلودار، شىعىس قازاقستان، قىزىلوردا وبلىستارىندا، شىمكەنت قالاسىندا 14 ادام، ونىڭ ىشىندە 3 بالا سۋعا باتىپ كەتكەن.
بيىلعى سۋعا شومىلۋ ماۋسىمىندا (الماتى - 35, شىعىس قازاقستان - 31, تۇركىستان وبلىسى - 23) سۋعا باتىپ كەتكەن ادامداردىڭ سانى كوپ بولدى.
ەلىمىزدە سۋعا شومىلۋعا رۇقسات ەتىلگەن 445 ورىن انىقتالدى، 6020 ەسكەرتۋ بەلگىسى ورناتىلدى. ادامداردىڭ سۋ ايدىندارىنداعى قاۋىپسىزدىگىن قامتاماسىز ەتۋ ءۇشىن جەكە جاعاجايلاردىڭ 689 قۇتقارۋشى- جاساقشىسى وقىتىلدى.
پوليتسيا دەپارتامەنتى ۆولونتەرلىك ۇيىمدارمەن بىرىگىپ قوعامدىق ورىندارداعى ءجۇرىس- تۇرىس جانە سۋ ايدىندارىندا قاۋىپسىزدىك قاعيدالارىن بۇزۋشىلاردى انىقتاۋ بويىنشا بىرلەسكەن رەيدتەر مەن پاترۋلدەۋ جۇرگىزدى.
اعىمداعى جىلعى 1-ماۋسىمنان باستاپ 33 مىڭ رەيد جانە پاترۋلدەۋ جۇرگىزىلدى، 6355 ادام اكىمشىلىك جاۋاپكەرشىلىككە تارتىلدى، «قوعامدىق ورىنداردا بولۋ قاعيدالارىن بۇزۋ» ا ق ب ك 440-بابى جانە «ورتاق سۋ پايدالانۋ قاعيدالارىن بۇزۋ» 364-بابى بويىنشا 14 ميلليوننان استام تەڭگە ايىپپۇل سالىندى.
رەيد ءىس- شارالارى بارىسىندا سۋ ايدىندارىنداعى قاۋىپسىزدىك شارالارى بويىنشا حالىقپەن ءتۇسىندىرۋ جۇمىستارى جۇرگىزىلدى. 499564 ۇگىت- ناسيحات ونىمدەرى (پاراقشالار، جادىنامالار) تاراتىلدى.