بۇل تۋرالى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى تەلەراديو جانە قوعاممەن بايلانىس كافەدراسىنىڭ مەڭگەرۋشىسى، فيلولوگيا عىلىمدارىنىڭ كانديداتى سەرىكزات دۇيسەنعازى ءبىلدىردى، دەپ حابارلايدى قازاقپارات ءتىلشىسى.
«ەلىمىزدىڭ پرەزيدەنتى قاسىم- جومارت كەمەل ۇلىنىڭ بيىلعى جولداۋىن تولىق تىڭدادىم. مەملەكەت باسشىسى ەل كوكەيىندە جۇرگەن كوپتەگەن ماڭىزدى ماسەلەلەرگە توقتالدى. اسىرەسە، قازىرگى جاعدايعا بايلانىستى ۇكىمەتتىڭ جۇمىسىن جۇيەلى ۇيىمداستىرۋ، ساياسي- ەكونوميكالىق احۋالدى جاقسارتۋ، قارجى جۇيەسىن، اۋىل شارۋاشىلىعىن، شاعىن جانە ورتا بيزنەستى، قۇقىق قورعاۋ سالاسىن دامىتۋعا بايلانىستى ناقتى تاپسىرمالار بەردى. اسىرەسە، قازىرگى حالىقتىڭ كوكەيىندە جۇرگەن شەتەلدىكتەرگە جەر ساتۋ ماسەلەسىنە نۇكتە قويىپ بەردى»، - دەدى ول.
سەرىكزات دۇيسەنعازى عىلىم- ءبىلىم سالاسىن دامىتۋ بويىنشا دا مەملەكەت باسشىسى ۇكىمەتكە ءبىرقاتار تاپسىرما بەرگەندىگىنە نازار اۋدارتادى.
«ماسەلەن، 500 عالىمنىڭ شەتەلدىك تاعىلىمدامادان ءوتۋى، جاس عالىمداردىڭ عىلىمي الەۋەتىن كوتەرۋ ءۇشىن 1000 گرانت ءبولۋ، تاعى سول سياقتى ماڭىزدى باستامالارى ەلىمىزدەگى عىلىم سالاسىنىڭ دامۋىنا ىقپال ەتەدى دەپ سەنەمىن. پەداگوگتاردىڭ جالاقىسىن 25 پايىزعا كوتەرۋ، مەكتەپكە دەيىنگى بالالاردىڭ بالاباقشا ماسەلەسىن 100 پايىزعا شەشۋ سياقتى تاپسىرمالارى دا كوڭىلدەن شىقتى. شاعىن جانە ورتا بيزنەستى دامىتۋ ءۇشىن سۋبسيديا بەرۋ، سالىق جۇيەسىن رەتتەۋ، الەۋمەتتىك جاعدايى تومەن وتباسىلاردىڭ باسپانالى بولۋى ءۇشىن زەينەتاقى قورىنىڭ ءبىر بولىگىن پايدالانۋدى جۇزەگە اسىرۋ سىندى جولداۋدا ايتىلعان حالىققا قاجەتتى تاپسىرمالارىن تولىقتاي قولدايمىن. پرەزيدەنتتىڭ ايتقان بارلىق تاپسىرمالارىن ۇكىمەتىمىز مۇلتىكسىز ورىندايدى دەپ سەنەمىن»، - دەدى كافەدرا مەڭگەرۋشىسى.