الماتى وبلىسىندا ەكى كولىك بەتپە- بەت سوعىسىپ، ءبىر ادام كوز جۇمدى

اتالعان كولىك اپاتىنا بايلانىستى الماتى وبلىستىق پوليتسيا دەپارتامەنتىنىڭ باسپا ءسوز قىزمەتى مالىمەت تاراتتى.

«وقيعا بۇگىن 06:40 شاماسىندا «الماتى- كوكپەك- كوكتال» تاسجولىنىڭ 65- شاقىرىمىندا بولعان. انىقتالعانداي، «Мitsubishi galant» ماشيناسىنىڭ جۇرگىزۋشىسى كولىك تىزگىنىنە يە بولا الماي، قارسى باعىتقا شىعىپ كەتكەن. ول 41 جاستاعى ازامات جۇرگىزىپ كەلە جاتقان «Мercedes benz sprinter» ماشيناسىنا بەتپە- بەت سوعىلعان. سالدارىنان قارسى باعىتقا شىعىپ كەتكەن كولىكتىڭ 26 جاستاعى جۇرگىزۋشىسى وقيعا ورنىندا كوز جۇمدى. سونداي- اق ونىڭ 45 جاستاعى جولاۋشىسى ءتۇرلى دەنە جاراقاتىمەن اۋرۋحاناعا ءتۇستى» دەلىنگەن اتالعان ۆەدومستۆونىڭ رەسمي حابارلاماسىندا.

قازىر اتالعان فاكتى بويىنشا ق ر ق ك 345-بابى بويىنشا قىلمىستىق ءوندىرىس قوزعالىپ، سوتقا دەيىنگى تەرگەۋ ءجۇرىپ جاتىر.

اۆتور: سامال قابىشيەۆا