پوليتسيا قىزمەتكەرلەرى ونى ۇرلىق كەزىندە اشكەرەلەگەن. Lexus اۆتوكولىگىن ەكى رەت توناعان كۇدىكتى بەينەباقىلاۋ كامەراسىنا ءتۇسىپ قالعان.
«جاقىندا ءبىزدىڭ كەزەكشى بولىمگە بالپىق بي اۋىلىنداعى ساۋدا ۇيلەرىنىڭ بىرىندە تۇرعان Lexus ماركالى اۆتوكولىگىنىڭ سالونىنان 150 مىڭ تەڭگە ۇرلاپ كەتكەن بەلگىسىز تۇلعالارعا قاتىستى شارا قولدانۋ تۋرالى جازباشا وتىنىشپەن 28 جاستاعى جەرگىلىكتى تۇرعىن جۇگىندى. كەلەسى كۇنى ازامات سول جەردە بەلگىسىز بىرەۋلەر تاعى 2 مىڭ ا ق ش دوللارىن ۇرلاعانى تۋرالى ارىزدانعان»، - دەدى كوكسۋ اۋداندىق پوليتسيا ءبولىمىنىڭ باستىعى راميل گيماديەۆ.
دەرەككوز مالىمەتىنشە، جەدەل ىزدەستىرۋ ءىس-شارالارىنىڭ ناتيجەسىندە، تىڭشىلار كۇدىكتى رەتىندە تالدىقورعان قالاسىنىڭ 23 جاستاعى تۇرعىنىن ۇستادى، ول جابىرلەنۋشىنىڭ ساۋدا ۇيىندە كومەكشىسى بولىپ قىزمەت اتقارعان. ۇستالعان كۇدىكتىدەن ۇرلانعان اقشانىڭ ءبىر بولىگى عانا تاركىلەندى، ال قالعان اقشاسىن كۇدىكتى جۇمساپ ۇلگەرگەن.
«بەينەجازبامەن جانە باسقا دا دالەلدى دەرەك كوزىمەن اشكەرەلەنگەن ازامات ۇرلىق جاساعانىن مويىندادى جانە اقشانىڭ ماشينادا ساقتالاتىنىن بىلگەنىن جانە قاراجاتقا اسا مۇقتاج ەكەنىن ايتتى، ول دۇكەننىڭ تەرەزەسىندە ماشينانىڭ كىلتىن قالدىرعان يەسىنىڭ سەنىمىن پايدالانىپ، ەكى رەت ءىرى كولەمدە اقشا ۇرلاعان»، - دەدى راميل گيماديەۆ.