ەۋروپا ليگاسى: «قايرات» پەن «ورداباسى» قارسىلاستارىن قابىلدادى
ايتا كەتەرلىگى، بيىل جارىستى جالعاستىراتىن كوماندا نەبارى ءبىر عانا ويىن ناتيجەسىمەن انىقتالادى. بۇل - UEFA تاراپىنان كوروناۆيرۋس ينفەكتسياسى جاعدايىنا بايلانىستى قاۋىپسىزدىك شاراسى رەتىندە قابىلدانعان شەشىم.
الماتىدا «قايرات» ارمەنيانىڭ «نوا» كومانداسىمەن كەزدەستى. «نوا» كلۋبىنىڭ قۇرىلعانىنا بار-جوعى ءۇش جىل تولعان. ەۋروكۋبوك ويىندارىندا العاش رەت باق سىناپ وتىر. تاجىريبەسى ازدىعىنا قاراماستان، ارمەنيالىق كلۋب الاڭ يەلەرىنە لايىقتى قارسىلىق كورسەتتى.
ەسەپتى «نوا» كومانداسى 8-مينۋتتا اشتى. ارىپتەسى پاۆەل دەوبالدتىڭ بەرگەن پاسىن كيريلل بور گولعا اينالدىرىپ كەتتى. وعان «قايرات» ساپىنان گۇلجىگىت ءالىقۇلوۆ 12-مينۋتتا ءبىر گولمەن جاۋاپ قايىردى. ال 35-مينۋتتا الماتىلىق كلۋب قاتارىنان ۆاگنەر لاۆ ەسەپتى ۇستەمەلەي تۇسسە، ول 70-مينۋتتا تاعى ءبىر گولدىڭ اۆتورى اتاندى.
قورىتىندى ەسەپتى 90-مينۋتتا الماتىلىق شابۋىلشى ادەرينسولا ەسەولا بەلگىلەدى. وسىلايشا «قايرات» جارىستىڭ كەلەسى ساتىسىنا جولداما الدى. ال شىمكەنتتە جەرگىلىكتى «ورداباسى» رۋمىنيانىڭ «بوتوشاني» كومانداسىنا 1:2 ەسەبىمەن ەسە جىبەردى. ويىننىڭ 25-مينۋتىندا رۋمىنيالىق كلۋبتان مارسەل حولتسمانن ەسەپ اشتى.
ال شىمكەنتتىك ماي ماحلانگۋ 31-مينۋتتا تارازى باسىن تەڭەستىردى. «بوتوشاني» ساپىنان 33-مينۋتتا ماركو دۋگاندجيچ ويىننىڭ نۇكتەسىن قويدى.
ايتا كەتەرلىگى، اتالعان كەزدەسۋدە «ورداباسى» ساپىنان ابدۋللاي دياكاتە پەنالتي سوعا العان جوق. ەندى جارىستىڭ ەكىنشى ساتىسىنىڭ جەرەبەسى 31- تامىزدا تارتىلادى. جارىستىڭ بۇل كەزەڭىندە «قايراتتان» وزگە ءبىزدىڭ ەلىمىزدىڭ اتىنان ەلوردالىق «استانا» مەن قىزىلوردانىڭ «قايسار» كوماندالارى قاتىسادى.