الماتىنىڭ ءبىلىم سالاسى قىزمەتكەرلەرىنىڭ «الماتىنىڭ ءبىلىم بولاشاعى: جاڭا جاعدايداعى پەرسپەكتيۆالىق شەشىمدەر» اتتى فورۋمىندا ب. ساعىنتايەۆ كەزەكشى توپتارداعى 1-2-سىنىپ وقۋشىلارمەن تاجىريبەلى مۇعالىمدەردىڭ جۇمىس ىستەيتىندىگىن اتاپ ءوتتى.
«ءبىرىنشى سىنىپ وقۋشىلارىنىڭ اتا-انالارى جوعارى وقۋ ورىندارىنىڭ تاجىريبەسىز تۇلەكتەرى نەمەسە سوڭعى كۋرس ستۋدەنتتەرى ساباق بەرەدى ەكەن دەپ الاڭداۋشىلىق بىلدىرۋدە. بۇعان جول بەرىلمەيدى. مەكتەپ تابالدىرىعىن جاڭادان اتتاعان بالالارمەن تاجىريبەلى مۇعالىمدەر جۇمىس جاسايتىن بولادى. ەش كۇدىكتەنبەڭىزدەر. ءبىلىم باسقارماسىنا ءتيىستى تاپسىرمالار بەرەمىن»، - دەدى الماتى اكىمى باقىتجان ساعىنتايەۆ.
فورۋمدا جاڭا جاعدايدا وقۋ پروتسەسىن ۇيىمداستىرۋ جايى تالقىلانۋدا. ونىڭ ىشىندە كەزەكشى توپتاردا سانيتارلىق قاۋىپسىزدىكتى ساقتاۋ، قاشىقتان وقىتۋدى ۇيىمداستىرۋ، پەداگوگتار مەن مۇقتاج وقۋشىلاردى كومپيۋتەرلىك تەحنيكامەن جانە ينتەرنەتپەن قامتاماسىز ەتۋ بار.
سونىمەن قاتار، بالاباقشالار مەن مەكتەپتەردە ورىنمەن قامتاماسىز ەتۋدىڭ وزەكتى ماسەلەلەرى دە تالقىلانۋدا.
اۆتور: الما مۇقانوۆا