وقيعا 2019-جىلى 18- قىركۇيەك كۇنى بولعان ەدى. يتىمەن اۋلادا سەرۋەندەپ جۇرگەن پەتروپاۆل تۇرعىنى الەكساندر سلاۆەتسكيگە ءوتىپ بارا جاتقان ادام جانۋارعا تۇمىلدىرىق كيگىزۋ كەرەكتىگىن ەسكەرتكەن. ستاففوردشير تەرەردىڭ يەسى بىردەن اشۋعا بەرىلىپ، ەسكەرتۋ جاساعان ازاماتقا ءيتىن ايتاقتاپ، ارقاسىنا اس پىشاعىن سۇعىپ العان.
پەتروپاۆل قالالىق سوتىندا 40 جاستاعى الەكساندر سلاۆەتسكي بولعان وقيعاعا وكىنىش ءبىلدىردى.
ونىڭ ايتۋىنشا، ءوتىپ بارا جاتقان ازامات ونىڭ يتىنە ءوزى جاقىنداعان. تۇمىلدىرىعىن شەشىپ، ىزالاندىرا باستاعان. ال، ءوزى ءيتتىڭ تىكەندى قارعىباۋىمەن ءارلى-بەرلى سىلتەپ، ءوزىن قورعاماق بولعان.
ءدال وسى كەزدە ءيتى يەسىنە كومەككە ۇمتىلىپ، جاپا شەگۋشىنى قولىنان قاۋىپ العان. سوت ەكى تاراپتى دا تىڭداپ، سارالاي كەلە سوتتالۋشىنىڭ كىناسىنىڭ دالەلدەنگەنىن جانە مەملەكەتتىك ايىپتاۋشى سۇراعان جازانىڭ ورىندى ەكەنىن ايتتى. جازانى تاعايىنداۋ بارىسىندا سوت سلاۆەتسكيدىڭ ماس كۇيىندە ادامعا شابۋىل جاساپ، ەش سەبەپسىز اۋىر، قوعام ءۇشىن قاۋىپتى قىلمىس جاساعانىن جانە ۋچاسكەلىك ينسپەكتور بەرگەن تەرىس مىنەزدەمەنى نەگىزگە الدى.
ال سلاۆەتسكيدىڭ سوتتا بەرگەن جاۋابى «جاۋاپكەرشىلىكتەن قاشۋ» دەپ قابىلدادى. وسىعان بايلانىستى سوت وعان 3 جىلعا باس بوستاندىعىنان ايىرۋ جازاسىن كەستى.