بۇل تۋرالى قاراعاندى مەديتسينا ينستيتۋتىنىڭ كلينيكالىق جۇمىستار جونىندەگى پرورەكتورى، COVID-19 بويىنشا كلينيكالىق حاتتامانى ازىرلەۋشى توپتىڭ جەتەكشىسى باقىت كوشەروۆا ايتتى، دەپ حابارلايدى قازاقپارات ءتىلشىسى.
«كوروناۆيرۋس ىندەتىن دياگنوستيكالاۋ مەن ەمدەۋ ۇلتتىق كلينيكالىق حاتتاماسىنىڭ العاشقى نۇسقاسى وسى جىلدىڭ 3 - اقپانىندا جاسالدى. حاتتامانىڭ العاشقى نۇسقاسىن حالىقارالىق ۇسىنىستار بولماعان كەزدە، دۇنيەجۇزىلىك دەنساۋلىق ساقتاۋ ۇيىمى ەشقانداي نۇسقاۋلىق شىعارماعان كەزدە ازىرلەگەن ەدىك. سودان بەرى شامامەن 8 اي ءوتتى. ءبىز دياگنوستيكالاۋ مەن ەمدەۋدىڭ كلينيكالىق حاتتاماسىن 10 رەت وزەكتەندىردىك. قازىرگى جاعدايدا كوروناۆيرۋس ينفەكتسياسىن ەمدەۋگە ينفەكتسيونيستەر، انەستەزيولوگتار، رەانيماتولوگتارمەن قاتار وزگە سالا دارىگەرلەرى دە تارتىلادى» ، - دەدى مەديتسينا عىلىمدارىنىڭ دوكتورى كوروناۆيرۋستىڭ ەكىنشى تولقىنىن تالقىلاۋعا ارنالعان ونلاين جيىندا.
وسى رەتتە ول ماۋسىم مەن شىلدە ايىندا ەلىمىزدە ورىن العان ىندەتكە شالدىعۋ كورسەتكىشىنىڭ بەلگىلى ءبىر دەڭگەيدە ساباق بولعانىن ايتادى.
«وتە كۇردەلى بولعانىنا قاراماستان دارىگەرلەر ءبىزدىڭ حاتتامانى قولداندى. بارلىق مەديكامەنتتەر كوروناۆيرۋس ينفەكتسياسىن دياگنوستيكالاۋ جانە ەمدەۋدىڭ ۇلتتىق كلينيكالىق حاتتاماسىنا سايكەس ساتىپ الىندى. حاتتاما جاساۋ - ۇلكەن ەڭبەكتى قامتيتىن جۇمىس. ءبىز كوروناۆيرۋس ينفەكتسياسىن ەمدەۋدە قولدانىلاتىن حالىقارالىق ءتاسىل مەن ۇزدىك تاجىريبەنى قولدانامىز. بۇگىن عانا دۇنيەجۇزىلىك دەنساۋلىق ساقتاۋ ۇيىمىنىڭ ساراپشىلارىمەن ونلاين كەزدەسۋ وتكىزدىك. ولار بىزگە كوروناۆيرۋس ىندەتىن ەمدەۋگە قولداناتىن بارلىق پرەپاراتتىڭ ەسپەريمەنتتىك ءدارى- دارمەك ەكەندىگىن ايتىپ وتىر. بۇگىنگى كۇنى ولاردىڭ 100 پايىز تيىمدىلىگى دالەلدەنبەگەن»، - دەدى باقىت كوشەروۆا.