مەملەكەت باسشىسى گرۋزيا پرەزيدەنتى سالومە زۋرابيشۆيليگە كوڭىل ايتتى
12:57, 25 - تامىز 2020
نۇر-سۇلتان. قازاقپارات - مەملەكەت باسشىسى گرۋزيا پرەزيدەنتى سالومە زۋرابيشۆيليگە كوڭىل ايتتى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
پرەزيدەنت قاسىم-جومارت توقايەۆ گرۋزيانىڭ شاتيلي تاۋلى مەكەنى ماڭايىندا ورىن العان جول-كولىك اپاتى سالدارىنان كوپتەگەن ادامداردىڭ قازا بولىپ، زارداپ شەككەنى تۋرالى سۋىت حاباردى تەرەڭ كۇيزەلىسپەن قابىلداپ، كوڭىل ايتۋ جەدەلحاتىن جولدادى.
«وسىنداي اۋىر ساتتە ورنى تولماس قايعىعا ورتاقتاسىپ، بارشا قازاقستاندىقتاردىڭ جانە جەكە ءوز اتىمنان دوستاس گرۋزيا حالقىنا، جاقىندارىنان ايرىلعان وتباسىلارعا كوڭىل ايتامىن. قاسىرەتتى وقيعادا زارداپ شەككەندەردىڭ تەز ارادا ساۋىعۋىنا تىلەكتەسپىن»، - دەلىنگەن جەدەلحاتتا.
ايتا كەتەيىك، وسىعان دەيىن گرۋزيانىڭ سولتۇستىك-شىعىسىنداعى تاۋلى ايماقتاعى جولدا اۆتوبۋس جاردان قۇلاپ، كەمىندە 17 ادامنىڭ مەرت بولعانىن جازعان ەدىك.